Professional boksning yengil vazn toifasida harakat qilayotgan Rayan Garsiya (20-0, 17 KO) o‘zining navbatdagi jangini yarimo‘rta vazn toifasida WBA Super kamari sohibi Menni Pakyaoga (62-7-2, 39 KO) qarshi o‘tkazishini e’lon qildi.
“Mening orzum haqiqatga aylandi. Pakyao bilan ringni bo‘lishish men uchun sharaf. Men har doim seni ringda va undan tashqarida qilgan ishlaring uchun hurmat qilaman. Kuchli ringda g‘alaba qozonsin”, — deya yozdi Rayan Garsiya.
ESPN nashrining xabar qilishicha, 42 yoshli filippinlik bokschi va 22 yoshli amerikalik sportchi o‘rtasidagi jang sentabr oyida bo‘lib o‘tadi. Jangni qayerda o‘tkazish borasida ikkita variant bor — Los-Anjeles (AQSh) va Saudiya Arabistoni.
Ayni damda muzokaralar boshlang‘ich pallada bo‘lib turibdi. Tomonlar bu to‘qnashuvga qadar bir martadan boshqa janglarda ringga ko‘tarilish variantini ham ko‘rib chiqmoqda. Shuningdek, jang qaysi vazn toifasida bo‘lishi ham noma’lum. Hozircha hech qanday kelishuvga erishilmagan.
Amerikalik jurnalist Stiv Kimga ko‘ra, bu ko‘rgazmali jang bo‘ladi.
Mavzuga doir: Menni Pakyao Filippinda partiya yetakchisiga aylandi. U 2022-yilda prezidentlikka o‘z nomzodini qo‘ymoqchi
Pakyao so‘nggi bor 2019-yilning iyun oyida ringga ko‘tarilgan va unda Kit Turmanni mag‘lub etgandi. Garsiya esa 2021-yilning 3-yanvarida Lyuk Kempbelni taslim etib, WBC’ning vaqtinchalik chempioni maqomini qo‘lga kiritdi.
Ma’lumot uchun, Menni Pakyao prof boksdagi ilk jangini 1995-yilda o‘tkazgan. Oradan 3 yil o‘tib esa Rayan Garsiya tug‘ilgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)