Марказий банк раиси ўринбосари Беҳзод Ҳамроев 21 январь куни бўлиб ўтган матбуот анжуманида республикадаги инфляция даражаси ҳақида маълумот берди, дея хабар бермоқда «Kun.uz».
Фото: «Дарё»
Мутахассиснинг таъкидлашича, 2020 йилда инфляция даражаси 2019 йилдагига нисбатан 4,1 фоизга пасайган бўлса-да, озиқ-овқат маҳсулотларида инфляция даражаси 15,3 фоизни ташкил этган. Бунинг асосий сабаби пандемия туфайли маҳсулот сотиш, етказиб бериш ва логистика омиллари таклифининг камайишига олиб келгани билан изоҳланган.
Марказий банк таҳлилларига кўра, 2 миллион сўмдан кам даромад топадиган аҳолининг қарийб 60-70 фоиз даромади озиқ-овқат маҳсулотларини сотиб олишга сарфланади. Бу рақамлар инфляция даражасини оддий аҳолининг кундалик турмушига сезиларли таъсир кўрсатганлигини англатади.
Шу билан бирга, ишлаб чиқаришда карантин сабаб муаммолар кузатилиши озиқ-овқатлар ва хизмат кўрсатиш соҳаларида талаб жиҳатдан ҳам инфляцияга таъсир кўрсатганлиги таъкидланди.
«2021 йилда инфляцияни келтириб чиқариши мумкин бўлган фундаментал омиллар йўқ, аммо айрим товарнинг бир марталик нархлари ошиши кузатилиши мумкин», – деди Беҳзод Ҳамроев.
Шунингдек, 2021 йил учун инфляция даражаси 9-10 фоиз бўлиши прогноз қилинди. Инфляцияни камайтириш мақсадида Молия вазирлиги ва Иқтисодий тараққиёт ва камбағалликни қисқартириш вазирлиги билан ҳамкорликда чоралар кўрилиши ҳақида маълумот берилди.
Аввалроқ 2020 йил давомида истеъмол бозоридаги инфляциянинг ўсиш даражаси 11,1 фоиз бўлганлиги ҳамда Марказий банк Молия вазирлигининг прогнозларига қарамай, 2023 йилда инфляция 5 фоизга етишига ишонаётгани ҳақида хабар берилганди.
