Bring & Trailer аукцион уйи «Форсаж» юлдузи Пол Уокерга тегишли бўлган ўрта моторли BMW М1 суперкари сотувга қўйилишини эълон қилди. Икки эшикли модель ажойиб ҳолатда сақланган бўлиб, у ҳозирга қадар 6,8 минг километр йўл босган. Савдолар якунланишига саккиз кун қолди, деб хабар беради Motor.
Ўрта моторли BMW М1 — ноёб ва камёб автомобиль ҳисобланади, чунки ундан 1978 йилдан 1981 йилга қадар 453 нусха ишлаб чиқарилган. Аукционга қўйилган купе бу борада ҳам ажралиб туради, чунки 1980 йиллар бошида М1’ни Германиянинг AHG дилерли модернизация қилган.
Икки эшикли модель пойга «обвес»и, BMW Motorsport белгиси, турли кенгликлардаги уч кўмпонентли BBC дискалари, махсус газ чиқариш тизими ва 280 дан 354 от кучигача бўлган 3,5 литрли, олти цилиндрга эга BMW М88/1 мотори билан ажралиб туради.
Суперкар интерьери дастлабки ҳолатдагидек сақланиб қолган: ўриндиқлар чарм билан қопланган, ойналари электрон кўтарилади, кондиционер ва магнитола бор. Актёр Пол Уокер BMW М1’га 2010 йиллар бошида эгалик қилган, машинанинг ҳозирги эгаси эса уни 2014 йилда сотиб олган.
Савдолари якунланишига саккиз кун қолган BMW М1 учун ҳозирда 390 минг доллар таклиф қилинмоқда.
Аввалроқ Австралияда «Форсаж» фильмида суратга тушган 50 йиллик Chevrolet аукционга қўйилгани тўғрисида хабар берилганди.
Изоҳ (0)