Toshkent viloyati Bekobod shahridagi markaziy buyum bozorida mast erkak o‘z tanishiga pichoq urdi. Bu haqda IIV Tergov departamenti xabar berdi.
Ma’lum qilinishicha, spirtli ichimlik ta’sirida bo‘lgan O.P. Toshkent viloyati Bekobod shahridagi markaziy buyum bozorida o‘zi bilan mardikorlik qiladigan tanishlarining oldiga borib, salomlashmoqchi bo‘lgan. Lekin tanishlaridan biri A.S. O.P.ning mast ekanini aytib, u yerdan ketib qolgan.
Shundan so‘ng O.P.ning jahli chiqib, mazkur bozor hududida joylashgan oshxonadan pichoq olib, A.S.ning orqasidan borib, unga bepisand munosabatda bo‘lding, deya qorin bo‘shlig‘iga bir marotaba urib, qasddan tan jarohati yetkazgan. Oqibatda A.S. Bekobod shahar markaziy shifoxonasiga yotqizilgan.
Qayd etilishicha, hozirda jinoyat ishi yuzasidan dastlabki tergov davom etmoqda. Hodisa joyini ko‘zdan kechirish vaqtida qon dog‘lari mavjud bo‘lgan oshxona pichog‘i ashyoviy dalil tariqasida rasmiylashtirilgan. Jinoyat ishi yuzasidan gumon qilinuvchi O.P. Bekobod shahar IIBning vaqtincha ushlab turish hibsxonasida saqlanmoqda.
Gumonlanuvchi O.P.ga nisbatan Jinoyat kodeksining 104-moddasi 2-qismi “e” va “l” bandlari (bezorilik oqibatida qurolni yoki sovuq qurol sifatida foydalanilishi mumkin bo‘lgan ashyolarni ishlatib, qasddan badanga og‘ir shikast yetkazish) bilan jinoyat ishi qo‘zg‘atilgan.
Mavzuga doir:
- Singlisi bilan gaplashmaslikni tayinlagan akani pichoqlagan andijonlik fuqaroga sud hukmi o‘qildi
- Sheroboddagi masjidda 46 yoshli fuqaro masjid kotibini pichoqladi. Jabrlanuvchi shifoxonaga olib ketilayotganida vafot etdi
- Toshkentda pichoqbozlikni sahnalashtirib, piar qilmoqchi bo‘lgan yigitlar 5 sutkaga qamaldi
Izoh (0)