Қашқадарё вилояти ҳокими Зоир Мирзаев бугунги кун амалдорлари ҳақида гапириб, «халқ дардини эшитмайдиган амалдорнинг умри узоқ бўлмаслигини» таъкидлади.
Бу ҳақда хабар берган «Дарё» мухбирининг ёзишича, вилоят раҳбари амалдорлар ҳақида Президент мурожаатномасига бағишланган йиғилишда маълум қилган.
«Одамларимизнинг талабчанлиги, яъни қонунларимизни билиши ва мамлакатда бўлаётган ўзгаришларни кузатиб бораётганлиги натижасида айрим амалдорларнинг айби ҳам очиб ташланмоқда. Бунда ОАВ вакиллари ва блогерларнинг ҳиссаси катта — буни улар фош қилмоқда. Мен илгари ҳам айтганман, раҳбар журналист ва блогерлар олдига ўзи чиқиб, халққа шахсан ўзи ҳисоб бериши керак. Матбуот анжумани ўрнига ўринбосарини ёки бирор-бир бўлим бошлиғини юбориши бу — бўлмайдиган иш. Нега раҳбарнинг шахсан ўзи халқ олдига чиқиб, очиқ-ойдин гапиролмайди? Бунинг иккита сабаби бор. Биринчи сабаби шундан иборатки, ўша раҳбарнинг журналист ва блогерлар саволларига жавоб беришга савияси етмайди. Иккинчидан эса ўша раҳбар ОАВ вакиллари ва блогерлардан қандай савол берилишини билади ва бу саволдан қочади. Бугун бундай раҳбарларнинг замони эмас. Замоннинг ўзи бундай раҳбарларни четга чиқариб ташлайди», — деди вилоят раҳбари.
Вилоят ҳокими Зоир Мирзаев ҳамма раҳбарлар ҳам журналист ва блогерлар томонидан қилинаётган танқидни тўғри қабул қилолмаслигини тан олган.
«Танқидни кўтаролмайдиган, халқ мурожаатини тингламайдиган раҳбар хоҳ у амалдор бўлсин, хоҳ унинг ёрдамчиси ёки бўлим бошлиғи умри узоқ бўлмайди», — деди Зоир Мирзаев.
Эслатиб ўтамиз, аввалроқ Зоир Мирзаев Қарши туманида халққа ҳокимсиз мурожаатнома йўлланганини танқид қилиб, журналист ва блогерлар олдига тўғридан-тўғри чиқолмайдиган раҳбарларни «У ё савиясиз, ёки саволлардан қўрқади» деганди.
Изоҳ (0)