«Икки мингга яқин ишчининг атиги юзга яқини деҳқонободлик ёшлар». Деҳқонобод калий заводида маҳаллий аҳолининг атиги 5 фоиз ёшлари ишлайди

Қашқадарё вилоятининг Деҳқонобод туманида жойлашган 1958 нафар ишчиси мавжуд бўлган Деҳқонобод калий заводида атиги 100 нафарга яқин деҳқонободлик мутахассислар ишлаётгани маълум бўлди. Бу ҳақда завод директори Ойбек Қурбонов ва туман ҳокими вазифасини бажарувчи Адҳам Қулмаматов иштирокидаги ёшлар билан мулоқотда маълум қилинди, дея хабар берди «Дарё» мухбири.

Таъкидланишича, Деҳқонобод туманини 10 кун муддатга бошқариш ҳуқуқини қўлга киритган Адҳам Қулмаматов 2021 йил 20 январь куни Деҳқонобод калий заводига бориб, ёшларни қийнаётган муаммоларни ўрганган.

Завод директори ва ёшлар ўртасидаги мулоқотда Адҳам Қулмаматов заводда ишлаётган деҳқонободлик ёш мутахассислар сони билан қизиққан.

«Шахсан ўзим 2016 йил Тошкент кимё технология институтининг магистратурасини тамомлаб, Деҳқонобод калий заводига иш сўраб борганман. Аммо ишга киролмаганман. Олийгоҳга киришдан аввал туманимизда шундай завод борлиги учун айнан шу институтда ўқиганман. Мени ва кўпчилик деҳқонободлик ёшларни қизиқтирган савол бор. Хўш, Деҳқонобод туманида жойлашган заводда шу институтни тамомлаб, ишга кирган ёшлар неча нафар кишини ташкил қилади?», — дея завод директорига савол билан юзланган Адҳам Қулмаматов.

Ушбу саволга жавоб берган завод масъуллари Деҳқонобод калий заводида 100 нафарга яқин деҳқонободлик олий маълумотли мутахассислар фаолият юритаётганини, заводнинг умумий ишчилари сони эса 1958 нафарни ташкил қилишини маълум қилган.

Адҳам Қулмаматовнинг қўшимча маълумот беришича, айни кунда туман ҳокимлигига 187 нафар мутахассис заводга ишга кириш бўйича мурожаат қилган.

«Шулардан 72 нафари олий маълумотли мутахассис бўлиб, заводга ишга кираман деган иштиёқда юрибди. Аммо ишга киролмаяпти», — деган ҳоким вазифасини бажарувчи.

Туман ҳокимлиги ахборот хизматининг эслатишича, туман ҳокими Зоир Алиқуловнинг 2020 йил 23 декабрь куни туманнинг чекка қишлоғидаги ёшлар билан учрашувида ҳам 26 ёшли Нурбек Қўйлиев заводга ишга киролмай юрганини айтиб, шикоят қилган.

Ҳоким билан мулоқот қилган фуқаро «Мутахассислигинг тўғри келмайди дейишди, ваҳоланки заводнинг механика бўлимида ишловчилар ҳам мен тугатган институтни, мен ўқиган факультетни тамомлаган», деган.

Эслатиб ўтамиз, 2020 йил 17 январь куни Қашқадарё ҳокими Зоир Мирзаев ўринбосарлари ва 15 нафар ҳудуд ҳокими тиббий кўрикдан ўтиш ҳамда даволаниш мақсадида Тошкент шаҳрига жўнаб кетганди. Уларнинг ўрнини эса ёшлар эгаллаб, 10 кун муддатга ҳудудни бошқаришга киришган.