Қашқадарёнинг Яккабоғ туманида яшовчи фуқаро шафқатсизларча калтакланиб, қийноққа солинди. Бу ҳақда ИИВ Тергов департаменти хабар берди.
Маълум қилинишича, жабрланувчи фуқаро К.А. 17 январь куни туман ИИБ бошлиғи номига ариза билан мурожаат қилган. Унда айтилишича, 15 январь куни соат 10:00 да синфдоши А.Қ. ва унинг турмуш ўртоғи Г.А. телефон орқали ўзларининг Қурашайх қишлоғидаги уйига чақирган. К.А. чақирилган уйнинг айвонига кирган вақтида А.Қ. уни уриб оёқ ва қўлларини арқон билан боғлаб, юз, бош ва сон соҳаларига таёқ билан қасддан урган. Бундан ташқари, рўзғор капгирини уйдаги темир печда қиздириб, К.А.нинг қорин соҳасига бир неча марта босиб куйдирган. Шу сабабли К.А. ҳолат бўйича қонуний чора кўришни сўраган.
Тиббий маълумотномага асосан К.А.да бош мия чайқалиши, бошнинг тепа ва чап чакка соҳасида қон қуйилиши, пешона соҳасида эзилиб, йиртилган яра, қорин пастки соҳаси куйган жароҳати ва бошқа тан жароҳатлари мавжудлиги қайд этилган.
Мазкур ҳолат юзасидан Яккабоғ туман ИИБ ҳузуридаги тергов бўлими томонидан Жиноят кодексининг 110-моддаси 1-қисми (қийнаш) билан жиноят иши қўзғатилган.
Дастлабки тергов ҳаракатлари давомида А.Қ. ишлаш мақсадида Россияга кетган вақтида жабрланувчи К.А. унинг турмуш ўртоғи Г.А.нинг олдига келиб турганлиги аниқланган.
Бундан ташқари, К.А. 15 январда шифохонага мурожаат қилган вақтида юқоридаги жанжални яширган ҳолда отдан йиқилиб, уни от судраб кетганлигини айтган Биринчи ёрдамни олиб шифохонадан чиқиб кетганлиги аниқланган.
Ҳозирда тергов ҳаракатлари олиб борилмоқда.
Изоҳ (0)