Ўзбекистонда 12 та вазирлик Президент ҳужжатларининг ижросига беписанд муносабатда бўлгани маълум қилинди

Ўзбекистонда Уй-жой коммунал хизмат кўрсатиш, Олий ва ўрта махсус таълим вазирлиги ва яна 10 та вазирликда Президент топшириқларини бажармаслик, муддатидан кечиктириб бажариш ёки сифатсиз бажариш ҳолатлари аниқланган. Бу ҳақда адлия вазирининг ўринбосари Худоёр Мелиев АОКАда бўлиб ўтган матбуот анжуманида маълум қилди, дея хабар бермоқда «Дарё» мухбири.

Худоёр Мелиевнинг айтишича, Адлия вазирлиги томонидан олиб борилган ўрганиш натижасида 12 та вазирликнинг деярли барчасида ижро интизомига амал қилмаслик ҳолатлари кузатилган.

«Энергетика вазирлиги ва АКТ вазирликларида аҳолининг эътирозларига сабаб бўлаётгани туфайли бевосита Президент топшириғига асосан ўрганишлар олиб борилмоқда. Ҳозирги пайтда Энергетика вазирлиги, Ахборот технологиялар вазирлиги, Жисмония тарбия ва спорт вазирликларида ҳамда Давлат активларини бошқариш агентлигида ўрганишлар кетяпти», — деди у.

Шунингдек, адлия вазири ўринбосари ижро интимози бўйича янги фармон қабул қилинадиган бўлса, яна 22 та соҳани ўрганиш режалаштирилганини маълум қилди.

Аввалроқ Адлия вазирлигига қабул қилинган ҳужжатларни масъулларга етказиш, амалиётда қўллашга кўмаклашиш ва назорат қилиш бўйича янги тизим жорий этиш вазифаси топширилганлиги ҳақида хабар берилган эди.

Шунингдек, давлат раҳбари уй-жой коммунал хизмат кўрсатиш вазири Музаффар Солиевни ишда йўл қўйган камчиликлари, қайта-қайта огоҳлантиришларга қарамай тегишли хулоса чиқармагани учун эгаллаб турган лавозимидан озод қилган эди. Олий таълим вазири Иномжон Мажидов эса тизимда ўзгариш қилолмагани учун ишдан олингани айтилган эди.

Бундан олдинроқ давлат раҳбари топшириғи билан устидан назорат бошланган АТК вазирлиги 2020 йилда мактабларга энг кўп ёрдам берган топ-10 вазирликлар қаторига кирган эди.

Энергетика вазирлигига эса аҳоли томонидан жуда кўплаб эътирозлар бўлмоқда. Жумладан, Бухоро вилоятининг икки туманида аҳоли ўз норозилигини йўлни тўсиб қўйиш орқали билдирган бўлса, ёш болакай уни шеър орқали ифода этганлиги ҳақида хабар берилган эди. Бунинг ортида депутат Дониёр Ғаниев энергетика вазирининг истеъфосини талаб қилган.