Германия ҳукумати мамлакатда жорий қилинган қатъий карантин чораларини 14 февралгача узайтирди. Бу ҳақда Германия канцлери Ангела Меркель 19 январь, сешанба куни ўтказилган 16 та федерал штат раҳбарлари билан музокарадан сўнг маълум қилди, деб ёзади Meduza.
Фото: BBC
Хусусан, Германия ҳукумати аҳолига жамоат транспорти ва дўконларда фақат тиббий ниқоб ёки FFP2 респираторларини тақишни буюрди. Бунгача матодан тикилган ниқоб тақиш ёки бурун ва оғизни шарф билан ёпишга рухсат берилганди.
Болалар боғчаси ва мактаблар ҳам 14 февралга қадар ёпиқ бўлади. Иш берувчилар иложи борича кўпроқ ходимларни уйдан ишлашга ўтказишга даъват этилди. Германия аҳолисидан ижтимоий алоқаларни минимал даражагача камайтириш сўралди.
Маълумот учун, FFP2 респираторларини тақиш талаби йирик федерал штат Баварияда 18 январдан бери амал қилмоқда. Ҳукуматнинг ушбу қарори респираторларнинг қимматлиги туфайли ҳар хил қабул қилинди. Уларнинг чакана нархи бир донаси учун икки евродан беш еврогача бўлиб, саккиз соат ишлатилгандан сўнг уни алмаштириш керак. 25 январдан респиратор кийиш талаби Австрияда ҳам кучга киради.
Эслатиб ўтамиз, 2020 йил 16 декабрдан бери Германияда кучли карантин ҳукм сурмоқда. Мамлакатда озиқ-овқат ва дорихоналардан ташқари барча дўконлар, сартарошхона, спорт зали, кинотеатр, музей ва театрлар ёпиқ.
Германия жануби-ғарбида 2020 йилнинг декабрь ойида коронавируснинг «британча» штамми билан касалланган илк бемор қайд этилганди.
