Қозоғистон ҳукумати ўз фуқароларини Россиянинг «Спутник V» вакцинаси билан 1 февралдан эмлашни бошлайди. Бу ҳақда мамлакат соғлиқни сақлаш вазири Алексей Цойга таяниб «Коммерсантъ» хабар берди.
«2021 йил 19 январь куни Қарағанда фармацевтика мажмуаси ва Россия тўғридан-тўғри инвестиция фонди ўртасида ‘Спутник V’нинг биринчи партияси — 20 минг доза вакцинани етказиб бериш бўйича битим имзоланиши режалаштирилган. 20 январь куни бир марталик импорт учун рухсатнома берилади ва вазирлик ‘СК-Фармация’га махсус харидни амалга ошириш учун хатлар юборади. 1 февралдан аҳоли ўртасида коронавирус инфекциясига қарши вакцинацияни бошлаш режалаштирилган», — дейди Цой.
Вазирнинг қўшимча қилишича, вакцинация вакциналарнинг келишига қараб босқичма-босқич амалга оширилади. Биринчи навбатда, юқумли касалликлар шифохонаси, тез ёрдам, реанимация бўлими, касалхоналардаги қабулхоналарда ишловчи шифокорлар, санитария-эпидемиологик хизмат ходимларини эмлаш режа қилинган. Шундан сўнг мактаб ва ОТМлардаги педагоглар эмланади. Вакцинациянинг учинчи босқичида сурункали касаллиги бор ва бошқа тоифага кирувчи фуқароларни эмлаш бошланади. Йил охирига қадар Қозоғистонда 6 миллионга яқин фуқарони эмлаш режалаштирилган.
Эслатиб ўтамиз, 2020 йилнинг декабрь охирларида Қозоғистон бош вазири Асқар Мамин Қозоғистон ва Россия президентлари Қосим-Жўмарт Тўқаев ҳамда Владимир Путин ўртасидаги келишувларни амалга ошириш доирасида Қарағанда фармацевтика мажмуасига ташриф буюриб, «Спутник V» вакцинасини ишлаб чиқаришга старт берганди. Мажмуа базасида босқичма-босқич 2 миллион доза вакцина ишлаб чиқариш режалаштирилган.
Маълумот учун, сентябрь ўрталарида Қозоғистонда QazCovid-in вакцинасининг клиник синовлари бошланган. Қозоғистон таълим ва фан вазири мамлакатда ишлаб чиқилган ушбу вакцинани ўзида синаб кўрганини маълум қилган.
Изоҳ (0)