COVID-19 вируси Ер сайёрасида абадий қолиши мумкин, юқори самарали вакцинанинг борлиги эса уни бутунлай йўқ қилиш учун кафолат бермайди, деб ёзади «РБК» Жаҳон соғлиқни сақлаш ташкилотининг (ЖССТ) Россиядаги вакили Мелита Вуйновичга таяниб.
COVID-19 мавсумий касалликка айланади, деб айтиш учун асослар борми, деган саволга жавобан у бундай вариант бўлиши мумкинлигини, аммо узил-кесил жавоб бериш учун бир нечта мавсум давомида кузатув олиб бориш кераклигини билдирди.
Вуйновичнинг сўзларига кўра, коронавируснинг бартараф этилиши ёки бутунлай йўқ қилиниши эҳтимолини кўриб чиқиш учун вакциналар иммунитетнинг қанча вақт давомида таъминлаши ва вакцинация дастурлари юқори иммунитетга эришишда қанчалик самарали эканини аниқлаш керак.
«Ҳатто юқори самарали вакцинанинг борлиги ҳам биз вирусни бутунлай йўқ қилишимиз ёки бартараф қилишимиз мумкинлигини кафолатламайди. Самарали глобал вакцинация дастури нуқтаи назаридан эҳтимолий воқеалар ривожи келажакда вирус паст даражали хавфга эга эндемик вирусга айланишидан иборат бўлиши мумкин», — деди у.
Аввалроқ «Роспотребнадзор» коронавирус инфекциясидан ўлим сонининг камайиши ва унинг тарқалиш потенциалининг ошиши вируснинг одамларга мослашганидан далолат бериши мумкинлигини таъкидлаб, агар бу тенденция давом этса, COVID-19 мавсумий касалликка айланишини маълум қилган эди.
Хитой Тиббиёт фанлари академиясининг патоген биология институти олимлари эса 2020 йил апрелидаёқ коронавирус йўқ бўлиб кетмаслиги ва у мавсумий грипп каби ҳар йили қайталанишини маълум қилганди.
Изоҳ (0)