Эндиликда ҳокимлардан маънавий ишлар ҳам қатъий талаб қилинади. Бу ҳақда бугун, 19 январь куни Президент Шавкат Мирзиёев раислигида ўтказилаётган маънавий-маърифий ишлар таъсирчанлигини янада оширишга бағишланган видеоселектор йиғилишида сўз борди, дея хабар бермоқда «Дарё» мухбири Миролим Исажонов.
«Бугунги мураккаб ва таҳликали ҳаётда биринчи навбатда, халқимиз, айниқса, ёшлар ўртасида маънавий-маърифий ишларни сифат ва мазмун жиҳатидан бутунлай янги босқичга кўтаришимиз керак. Ҳозирги кунда маънавий тарбия тизимининг янги платформаси, стратегиясини яратиш тобора муҳим вазифага айланмоқда.
Республика маънавият ва маърифат кенгаши раиси Президент экани белгилаб қўйилган. Кенгашнинг ҳудудий бўлимларига масъуллик ҳокимлар зиммасига юклатилган. Бу ўзгариш маънавий-маърифий ишларни давлатимиз сиёсатида янада юксак ўринга кўтарди. Бу фақатгина ҳокимларнинг эмас, балки вазирлар, компания раҳбарлари ва тадбиркорларнинг ҳам энг муҳим вазифасига айланиши керак.
Мана, соҳада кластер тизимига ўтиш, фермерлик ва кооперацияни кучайтириш асосида ҳокимларни қишлоқ хўжалиги ишларидан аста-секин озод қиляпмиз. Энди улардан маънавий ишларни ҳам қатъий талаб қилишга ҳаққимиз бор. Маънавият билан, аввало, биринчи раҳбарлар шахсан шуғулланмаса, ким жон куйдиради? Боғимизда бир дарахтга қурт тушса ёки даламизда буғдойга занг тушса, дарров чорасини кўрамиз. Лекин маънавиятимизга ‘қурт тушса’ нима учун эътибор қилмаймиз? Бир ҳақиқатни барча раҳбарлар билиши керак: фақат ҳисобот учун йиғилишлар вақти ўтди», – деди Президент.
Аввалроқ Қашқадарёдаги ҳокимлар даволаниш учун Тошкентга жўнаб кетгани, Қорақалпоғистон раҳбари ва 6 вилоят ҳокими 28 январдан таътилга чиққани ҳамда Жиззах вилояти ҳокимининг қурилиш масалалари бўйича ўринбосари ишдан олингани ҳақида хабар берилганди.
Изоҳ (0)