АҚШда коронавирусга чалинганлар сони 24 млн кишига етди

Америка Қўшма Штатларида коронавирус инфекциясини юқтирганлар сони 24 миллион 62 мингдан ошди, дея хабар беради «Коммерсантъ» Жонс Ҳопкинс университети маълумотига таяниб.

Сўнгги бир кеча-кундузда мамлакатда деярли 180 мингга яқин янги касалланиш ҳолати қайд этилди. Айни вақтгача жами 283 миллиондан ортиқ одам коронавирусга тест топширди.

АҚШда COVID-19 қурбонлари сони 398 мингга етди. Ўтган бир кеча-кундузда 1,7 минг нафар киши вафот этди, аввалги куни мазкур кўрсаткич 3,3 минг нафарни ташкил қилган эди.

Вирус юқтирганлар ва ўлимлар сони бўйича АҚШ етакчи бўлиб қолмоқда. Умуман олганда, дунё бўйлаб 95,5 миллион одам коронавирусга чалинди ва деярли 2 миллион киши вафот этди.

Эслатиб ўтамиз, АҚШда Pfizer ва BioNTech вакциналари билан аҳолини эмлаш 14 декабрь куни бошланган.

Аввалроқ АҚШда 11 миллион дозадан ортиқ вакцина ишлатилгани ҳамда умумий ҳисобда 9,7 миллион киши эмлангани ҳақида хабар берилган эди. Уларнинг 1,3 миллиони коронавирусга қарши иммунитетнинг шаклланиши учун зарур бўлган вакцинанинг иккинчи дозасини олган.