Ёш ўтиши билан юзда мимика ажинларининг кўпайишидан қочиб бўлмайди. Лекин тўғри парвариш қилиш орқали унинг эрта пайдо бўлишини ортга суришга эришиш мумкин. Бунинг учун эса нималардан қочиш кераклигини билиб қўйган яхши.
Ҳаддан ортиқ иссиқ ёки совуқ сувда ювиниш
Бу аёллар томонидан энг кўп йўл қўйиладиган хато ҳисобланади. Кундалик ювиниш учун сув ҳарорати, хонаники сингари 23-24 даража бўлиши керак, қайноқ ёки совуқ эмас. Баъзида кўз остига косметик муз бўлакларини қўйиш мумкин, лекин ҳар куни юзга совуқ теккизган яхши эмас. Бунда терига зарар етади. Иссиқ сув ҳам шундай таъсир қилади, қуритиб юборади ва ажин кўпайиши эҳтимоли ортади.
Кўз учун махсус демакияждан фойдаланмаслик
Юзни ювиш ва тозалаш учун ишлатиладиган кўпик ва гел ёрлиқларига кўз атрофига ишлатмаслик кераклиги ёзиб қўйилган бўлади ва бу бежизга эмас. Ушбу маълумот, дарҳақиқат, фойдали ва унга амал қилиш керак. Юз ва кўз атрофидаги тери алоҳида парвариш талаб қилади. Шу сабаб ҳам қовоқлардаги косметика қолдиқларини махсус кўпик ёки таркибида ёғ бўлган икки турли восита билан артиш керак бўлади.
Кўз остига оддий юз кремидан фойдаланиш
Юқорида таъкидланганидек, кўз ва унинг атрофи учун алоҳида косметик восита бўлиши керак. Юзга суртиладиган крем қанчалик қиммат ва сифатли бўлишига қарамай, уни кўз остига суртмаслик керак.
Намлантиришни эсдан чиқариш
Ажин пайдо бўлишининг сабабларидан бири терининг қуруқлиги ҳисобланади. Етарлича намлантирилган тери узоқ вақт силлиқ бўлиб туради, мушаклар ва тери ости ёғлари деярли йўқ экани сабаб бу айниқса кўз атрофидаги тери учун долзарб ҳисобланади. Юзни кунига икки маҳал макияждан аввал ва кечаси макияж тозаланганидан кейин парвариш қилиш керак.
Кремни нотўғри ҳаракатлар билан суртиш
Кўз атрофига кремни енгил ҳаракатлар билан суртиш, суякка тегадиган даражада ҳаракатлар қилмаслик керак. Ҳар куни кечқурун қовоқларни ички бурчакдан ташқига, кўз остини эса ташқидан ички бурчакка томон ҳаракатлантириб микромассаж қилинг. Ушбу оддий ҳаракатлар қон циркуляциясини яхшилаб, терини таранглашишига ҳисса қўшади.
Қуёш нурларидан ҳимояловчи кўзойнак тақмаслик
Қуёш нурларидан ҳимояловчи кўзойнак тақмаганда, тери аҳволи ёмонлашади ва бу ажинлар кўпайишига олиб келади. Шу сабаб ҳам кўчага иложи борича ультрабинафша фильтрли кўзойнак тақиб чиқиш керак.
Нотўғри диоптрияли кўзойнак
Кўриш қобилияти яхши бўлмаганда киши бирон нарсани кўриш учун кўзларини қисиб қарайди ва бу майда мимика ажинларининг келиб чиқишига олиб келади. Шу сабаб ҳам кўз шифокорининг олдига борганда тўғри диоптрияли (оптик шишаларнинг ёруғликни синдириш кучи бирлиги) кўзойнак ёздириш керак.
Макияжни тозаламасдан ухлаш
Кечаси ювилмаган ва тозаланмаган тень, туш ва подводка қолдиқлари тери аҳволига зарар етказади. Шу сабаб ҳам қаттиқ чарчаган тақдирингизда ҳам юзингизни бўёқлардан тозалашга эринманг.
Изоҳ (0)