Ўзбекистон Афғонистонга электр энергияси етказиб бериши жамоатчилик орасида кенг муҳокамаларга сабаб бўлгани сабабли Энергетика вазирлиги бу борада изоҳ берди.
Қайд этилишича, Афғонистонда тинч ҳаётни ўрнатиш мақсадида Ўзбекистон ва Афғонистон ўртасида электр энергиясини етказиб бериш юзасидан ҳукуматлараро келишув имзоланган.
Унга кўра, томонларнинг мажбуриятлари аниқ белгиланган бўлиб, ушбу келишувга асосан йиллик 2 миллиард 200 миллион киловатт соат электр энергиясини етказиб бериш кўзда тутилган.
Мазкур келишув доирасида етказиб берилаётган электр энергияси ички бозорга салбий таъсир кўрсатмаслигини таъминлаш мақсадида қўшни давлатлар энерготизимларидан ҳам қўшимча импорт қилиниб, Афғонистонга унинг бир қисми экспорт қилинмоқда.
«Таъкидлаш жоизки, Марказий Осиё мамлакатларининг ягона энерготизими Афғонистон энерготизими билан фақатгина Ўзбекистон орқали боғланган, яъни ягона энерготизим мамлакатларида ишлаб чиқарилган электр энергияси фақатгина Ўзбекистон орқали экспорт қилиниши мумкин.
Ушбу мавзулар юзасидан турли интернет нашрлар ва ижтимоий тармоқлардаги музокаралар айрим ҳолларда нотўғри рақамлар ва фактларга асосланган бўлиб, ҳақиқий ҳолатни акс эттирмаяпти», — дейилади вазирлик баёнотида.
Маълумот учун, 2020 йилнинг августида «Ўзбекистон миллий электр тармоқлари» АЖ ва Афғонистоннинг Da Afghanistan Breshna Sherkat компанияси (DABS) ўртасида 10 йил муддатга электр энергиясини етказиб бериш тўғрисида битим имзоланган.
«Review.uz» маълумотларига кўра, Афғонистон электр энергиясининг асосий қисмини қўшни давлатлардан импорт қилади. 2017–2018 йилларда импортнинг умумий ҳажми 4,6 миллиард киловатт соатни ташкил этди. Унга кўра, Ўзбекистон – 2 миллиард киловатт соат, Тожикистон – 1,2 миллиард киловатт соат, Эрон – 724 миллион киловатт соат, Туркманистон – 658,8 миллион киловатт соат энергия етказиб берган.
Аввалроқ Ўзбекистон электр станцияларидаги техник муаммолар туфайли Афғонистонга етказиб бериладиган электр қуввати 450 мегаваттдан 300 мегаваттгача тушиб кетгани, шу сабабли Кобулнинг аксарият қисми электр энергияси билан боғлиқ қийинчиликларни бошдан кечиргани ҳақида хабар берилганди.
Изоҳ (0)