Тошкент шаҳар Транспорт бошқармаси фуқароларга мурожаат қилиб велосипед йўлаклари ва велошерингларни ривожлантириш борасидаги таклифлари билан бўлишишга чақирди. Таклифлар аҳоли учун мазкур хизматларнинг сифати ва максимал даражада фойдасини таъминлаш учун зарур бўлиб, уларни toshkent@mintrans.uz почтасига юбориш мумкин.
Эслатиб ўтамиз, Вазирлар Маҳкамасининг 2020 йил 29 декабрдаги 812-сонли «Автотранспорт воситаларини ёллаш ва ижарага бериш фаолиятини қўллаб-қувватлаш, электромобиллар ва мототранспортлардан фойдаланиш, шунингдек, велосипедда мамлакат бўйлаб ҳаракатланишни ривожлантиришга оид қўшимча чора-тадбирлар тўғрисида»ги қарорига асосан Тошкент шаҳрида велосипед учун алоҳида йўлаклар ҳамда велошеринг хизматини йўлга қўйиш режалаштирилган.
Вазирликка 1 февралга қадар Ўзбекистонда велотранспортни ривожлантириш бўйича комплекс тадбирлар дастури лойиҳасини ишлаб чиқиш топширилган.
Дастурдан қуйидаги бандлар ўрин олиши керак:
- велосипедда ва бошқа шахсий воситаларда ҳаракатланиш имконини берувчи тўсиқсиз ва хавфсиз муҳитни (тартибга солинадиган ва солинмайдиган йўл кесишмалари, Йўл ҳаракати қоидаларига зарур ўзгартириш ва қўшимчалар киритиш, велойўлкалар, велойўллар, велошоссе, светофорлар, йўл белгилари, велосипедларни тўхтатиб қўйиш жойлари, велосипедларни сақлаш учун ишончли шароитлар ва бошқалар), шу жумладан, давлат-хусусий шериклик механизмлари орқали яратиш;
- туристик шаҳарлар, дам олиш зоналари, қўриқхоналар ва мамлакатимизнинг бошқа маданий мерос объектларини боғловчи велосипедлар магистраллари миллий тармоғини босқичма-босқич барпо этиш;
- шаҳарлар ва ҳудудларни велосипедлаштириш бўйича кўрилаётган чора-тадбирлар самарадорлигини баҳолаш ва уларни ҳар йили мониторинг қилиш учун мезонлар (индикаторлар) жорий этиш (бир йилда велосипедлар иштирокида юз берган йўл-транспорт ҳодисалари сони, аҳолининг муайян сонига нисбатан велосипедчилар сони, тоифалар бўйича велосипед йўлкалари, велочорраҳалар, велосипед қўйиш жойлари ва улардаги тўхтаб туриш жойлари);
- велосипедда ҳаракатланиш, велосипед транспорти ва шахсий ҳаракатланиш воситаларининг инсон саломатлигини мустаҳкамловчи транспорт тури, шунингдек, экологик тоза ҳаракатланиш воситаси сифатида оммалаштириш ва тарғиб қилиш;
- велосипедда ҳаракатланишни, шу жумладан, велосипедлар ва уларнинг бутловчи буюмларини харид қилишда давлат томонидан қўллаб-қувватлаш;
- аҳолида велосипедчилик маданиятини шакллантириш;
- Бутунжаҳон велосипед куни ва Европа ҳаракат ҳафталигига бағишланган йирик веломарафонлар, велосипедда йўл босиб ўтиш ва бошқа тадбирларни ўтказиш.
Бундан ташқари, элчи «француз ҳукумати билан Ўзбекистонда велосипед транспорти ва велоинфратузилмасини, шу жумладан, велосипед ишлаб чиқарувчиларни ва ушбу соҳада хизмат кўрсатувчи бошқа компанияларни жалб қилиш орқали ривожлантириш борасида икки томонлама яқин бизнес ва ишчи алоқаларини ўрнатиш масаласини кўриб чиқиши керак».
Ички ишлар ва Соғлиқни сақлаш вазирликларига оилавий поликлиникалар ҳамда профилактика инспекторларини велосипедлар билан жиҳозлаш чораларини кўриш топширилган.
Шунингдек, Транспорт вазирлигига манфаатдор вазирликлар ва идоралар билан биргаликда икки ой муддатда енгил автомобиллар ва мототранспорт воситаларини қисқа муддатли ижарага бериш тартиби тўғрисидаги янгиланган низом лойиҳаси ҳамда норматив-ҳуқуқий ҳужжатларга ўзгартириш ва қўшимчалар киритиш тўғрисида таклифларни киритиш вазифаси қўйилган.
Эслатиб ўтамиз, Президент Шавкат Мирзиёев 2020 йил декабрь охирида Олий Мажлисга йўллаган мурожаатномасида Ўзбекистоннинг барча туман марказлари ва шаҳарларда пиёдалар ва велосипед йўлаклари барпо этилишини маълум қилганди.
Изоҳ (0)