«Бу кутилмаганда содир бўлди, бироқ ҳали нуқта қўйилгани йўқ». Роман Сайфулин Compass ва Samarqand Darvoza’даги Makro ва Carrefour ҳақида

Makro супермаркетлар тармоғи бошқарувчиси Роман Сайфулин Франциянинг Carrefour савдо тармоғи Compass ва Samarqand Darvoza’даги Makro супермаркетлари ўрнида очилишига муносабат билдирди, деб хабар беради Spot.

Сайфулиннинг сўзларига кўра, 2021 йил 7 январь куни Majid Al Futtaim компаниясининг баёноти ва ОАВдаги хабарлар тўлқини Makro ва унинг харидорлари учун кутилмаган «совға» бўлган.

Йил компаниямиз учун Carrefour’нинг Compass ва Samarqand Darvoza савдо-кўнгилочар марказларидаги (СКМ) Makro супермаркетлари ўрнида дўконларини очиши борасидаги кутилмаган баёнот билан бошланди, айниқса якунланмаган шартномаларни ҳисобга олганда.

Аввалига шуни таъкидлашни истардимки, юқорида номлари келтирилган савдо-кўнгилочар масканларидаги Makro супермаркетлари ушбу масканларнинг биринчи иш кунидан очилган.

Компаниямиз ушбу савдо-кўнгилочар марказлари раҳбарияти билан очилишдаги барча қийинчиликларни, танилиш ва ташриф буюрувчиларни жалб этишга йўналтирилган тадбирларни ташкиллаштиришдаги барча мураккабликларни биргаликда босиб ўтди.

Компаниямиз томонидан ушбу локацияларда мижоз базаси ишлаб чиқилди, ишонч, умид ва сифат муҳити яратилди, бу Makro супермаркетлар тармоғи ва савдо-кўнгилочар масканга ташриф буюрувчи истеъмолчилар учун муҳим аҳамиятга эга.

Ҳозирда СКМ раҳбарияти билан музокаралар ўтказилмоқда. Вазият бўйича менинг субъектив фикрим шундай — Makro компанияси мазкур савдо-кўнгилочар марказларининг узоқ муддатли ва ўзини яхши томондан кўрсатган ҳамкори сифатида ижарачининг қонунчилик билан мустаҳкамланган устун ҳуқуқларига талабгор бўлиши мумкин.

Ҳар қандай ҳолатда ҳам қабул қилинган қарор имзоланган шартнома ва амалдаги қонунчиликка мос келади.

Makro Compass’дан кетадими? Шуни айтишим мумкинки, ҳозирча нуқта қўйилгани йўқ, бироқ ҳамон ушбу дўконни сотиш бўйича музокаралар ўтказилмоқда.

Samarqand Darvoza’га келадиган бўлсак, барча ҳаракатларимиз СКМ раҳбарияти билан ўтказадиган музокараларимиз натижасига боғлиқ бўлади, ушбу масала бўйича баҳсли ҳолат юзага келса, қонунчилик доирасида тартибга солинади.

Роман Сайфулин, Makro супермаркетлар тармоғи бошқарувчиси