Марказий банк 2021 йилда исломий молия концепциясини ўз ичига олган нобанк кредит ташкилотлари тўғрисида қонун лойиҳасини ишлаб чиқишни режалаштирмоқда. Бу ҳақда Марказий банк раиси ўринбосари Беҳзод Ҳамроевга таяниб, «Gazeta.uz» маълум қилди.
Бундай таклифни Президент Шавкат Мирзиёев 29 декабрь куни парламентга қилган Мурожаатномасида айтиб ўтди. Давлат раҳбари Марказий банкка молия бозорида рақобатни кучайтириш, шунингдек, исломий молия механизмларини жорий этиш мақсадида ҳуқуқий асос яратиш учун 1 февралгача нобанк кредит ташкилотлари тўғрисидаги қонун лойиҳасини кўриб чиқиш топшириғини берди.
Ислом банки шариат тамойилларига мос келадиган молиявий фаолиятдир. Ислом банкининг асосий характеристикаси бу кредит миқдори ва муддатига қараб ҳисобланган фоизлар ёки ставкаларни олишни тақиқлаш ҳисобланади. Ушбу тақиқ мусулмонларнинг ижтимоий адолат ва тенглик тўғрисидаги қонунлари билан изоҳланади.
Беҳзод Ҳамроев янги қонун молия бозорида рақобатни кучайтиришини таъкидлади. Нобанк ташкилотларга кўпроқ хизматлар кўрсатиш ҳуқуқи берилади.
Сентябрь ойи бошида «Нобанк кредит ташкилотлари ва микромолиявий фаолият тўғрисида»ги қонун лойиҳаси муҳокамага қўйилди, аммо у исломий молиялаштиришни назарда тутмаган.
2018 йил май ойида муҳокама учун тақдим этилган Президент фармони лойиҳаси Ўзбекистонда исломий банк ва молия инфратузилмасини яратишни режалаштирган.
Ҳужжатда фоизлар (рибо) шаклида иш ҳақини тўлашни тақиқлаш, лойиҳада иштирок этиш улушига мутаносиб равишда тадбиркор билан фойда ва зарарни тақсимлаш, суғурта фаолиятини (такафул), лизинг фаолиятини (ижара), қимматли қоғозлар билан операциялар (суқуқ) ва исломий молиялаштириш тамойилларига асосланган бошқа операциялар амалга оширишни тартибга солувчи норматив-ҳуқуқий ҳужжатларни ишлаб чиқиш кутилмоқда.
Аввалроқ Ўзбекистонда ислом молиялаштириш тамойиллари асосида қимматли қоғозлар жорий этилиши ҳақида хабар берилганди.
Изоҳ (0)