Вазирлар Маҳкамасининг «Етим болалар ва ота-онасининг ёки бошқа қонуний вакилларининг қарамоғидан маҳрум бўлган болаларнинг ижтимоий ҳимоясини янада кучайтириш чора-тадбирлари тўғрисида» 2019 йил 21 ноябрдаги 739-сон қарорига ўзгартириш киритиш ҳақидаги қарор лойиҳаси эълон қилинди.
Унга кўра, муқаддам қасддан жиноят содир этган шахслар томонидан фарзандликка олишни тақиқлаш тизимини ижтимоий хавфлилигига қараб белгилаш кўзда тутилмоқда.
Амалдаги қонунчиликда қасддан содир этган жиноятлари учун илгари ҳукм қилинган шахслар вояга етмаганларни фарзандликка олишига йўл қўйилмайди. Бу эса ижтимоий аҳамияти катта бўлмаган, унча оғир бўлмаган ҳамда фарзандликка олишга тўсқинлик қилмайдиган жиноят турлари (иқтисодиёт, экология соҳасидаги жиноятлар ва ҳ.к.) учун ҳам татбиқ қилинади.
Таҳлилларга кўра, мамлакатда фарзандликка олиш истагини билдирган шахслар 4 мингдан ортиқни ташкил қилади. Бугунги кунда фарзандликка олиш истагида навбатда турганларнинг сони фарзандликка берилаётганларга (ҳар йили ўртача 200 нафар бола) нисбатан анча юқори эканлиги таъкидланган.
Қарор лойиҳасига кўра, муқаддам қасддан жиноят содир этган шахслар томонидан фарзандликка олишни тақиқлаш тизимини ижтимоий хавфлилигига қараб белгилаш мақсадида Вояга етмаган болаларни фарзандликка ва оилага тарбияга олиш (патронат) тўғрисидаги низом ичига кирувчи «шахсга, тинчлик ва хавфсизликка, жамоат хавфсизлиги ва жамоат тартибига қарши оғир ва ўта оғир жиноятларни қасддан содир этганлик учун илгари ҳукм қилинганлар» таҳририда баён этиш кўзда тутилмоқда.
Мавзуга доир:
- Танзила Норбоева бир йилда ота-она қарамоғидан маҳрум бўлган болаларнинг қанчаси оилаларга фарзандликка берилаётганини маълум қилди
- Ўзбекистонда 2021 йилда чин етим болаларни уй-жой билан таъминлаш учун 30 млрд сўм ажратилиши маълум қилинди
- Тошкентда икки йилдан буён Меҳрибонлик уйлари битирувчиларига нафақа тўланмаяпти. Шаҳар молия бошқармаси бунга изоҳ берди
Изоҳ (0)