АҚШнинг Сан-Диего шаҳридаги ҳайвонот боғида иккита горилла коронавирус инфекциясига чалинди, деб ёзади «РБК». Бу вируснинг одамсимон маймунларга юқиши ҳақида маълум бўлган биринчи ҳолатдир, дейилади ҳайвонот боғи маъмурияти тарқатган пресс-релизда.
Маймунлар 6 январда йўталишни бошлаган, шундан кейин уларда коронавирус борлиги гумон қилиниб, тестлар ўтказилган. АҚШ Қишлоқ хўжалиги вазирлиги лабораторияси 11 январь куни жониворларнинг COVID-19’га чалинганини тасдиқлади. Ҳайвонот боғидагилар вирусни бошқа гориллалар ҳам юқтириб олган бўлиши эҳтимолини рад этмаяпти.
Айни пайтда касал жониворлар карантинга олинган. Ҳайвонот боғи уларнинг бутунлай соғайиб кетишига умид қилмоқда. «Бир оз бурун битиши ва йўтални ҳисобга олмаганда, гориллалар ўзларини яхши ҳис қилмоқда», — деди ҳайвонот боғи ижро этувчи директори Лиза Петерсон.
Тавсия этилган барча чораларга амал қилинганига қарамай, ҳайвонлар коронавирусни уни симптомларсиз ўтказган бирор ходимдан юқтириб олгани тахмин қилинмоқда. Ҳайвонот боғи ташрифчилар учун 6 декабрдан ёпилган.
БМТнинг ҳайвонларни ва биохилма-хилликни асраш соҳасидаги конвенцияси анжумани иштирокчиси, биолог Мария Воронцова жониворларнинг жами 40 га яқин тури коронавирусга чалина олишини маълум қилганди. Биология фанлари доктори Михаил Гельфанднинг аниқлик киритишича, барча сут эмизувчиларнинг ҳужайраларида рецепторлар бўлиб, уларга назарий жиҳатдан, вирус «сакраб ўтиши» мумкин. Аммо амалда одам уни ёввойи табиат шароитида юқтириши амри маҳол.
Изоҳ (0)