АҚШ вице-президенти Майк Пенс Дональд Трампни 25-тузатиш ёрдамида четлатишдан бош тортди

АҚШ вице-президенти Майк Пенс Дональд Трампни мамлакат раҳбари лавозимидан четлатилишига қарши фикр билдириб, Конституциянинг 25-тузатишини қўллашдан бош тортди. Бу ҳақда у вакиллар палатаси спикери Нэнси Пелосига йўллаган мактубида маълум қилган, деб хабар беради «РБК».

«Президентлик муддатининг тугашига саккиз кунгина қолган пайтда сиз ва демократлар партияси мен ҳамда вазирлар маҳкамаси 25-тузатишдан фойдаланишни талаб қиляпсиз. Бу каби хатти-ҳаракатлар мамлакатимиз манфаатларига ёки конституциямизга мос келади деб ҳисобламайман», — дейилади мактубда.

Пенснинг сўзларига кўра, 25-тузатиш жазолаш ёки ҳокимиятни тортиб олиш воситаси ҳисобланмайди, уни шу тарзда қўллаш эса «даҳшатли прецедент яратган бўларди». Вице-президент Конгрессни жамиятнинг бўлиниши ёки кескинликнинг ортишига олиб келадиган ҳаракатлардан қочишга чақирган. «Сайланган президент Жо Байденнинг инаугурациясига тайёргарлик жараёнида мамлакатимизни бирлаштириш ва қизғинликни камайтириш учун келинглар, бирга ишлайлик», — деб ёзади Пенс.

Эслатиб ўтамиз, АҚШда 3 ноябрь куни бўлиб ўтган президент сайловлари натижаларини сайловчилар ҳайъати 15 декабрь куни қўллаб-қувватлаб, демократлардан номзод Жо Байденни ғолиб деб эълон қилди. Конгресс якунларни 6 январь куни тасдиқлаши керак эди. Бунга сайловда мағлуб бўлган президент Дональд Трампнинг тарафдорлари халақит берди: улар Конгресс биноси ёнида йиғилиб, ичкарига бостириб кирди. Полиция уларни фақат куч билан қувиб чиқара олди.

Конгрессменларнинг бир қисми Капитолийдан эвакуация қилинди. Вашингтонда комендантлик соати эълон қилиниб, тартибни сақлаш учун АҚШ пойтахтига Миллий гвардия кучлари киритилди. Тўқнашувларда беш киши ҳалок бўлди.

Кейинроқ 7 январь куни АҚШ Конгресси мажлисини давом эттириб, Жо Байденнинг АҚШнинг 46-президенти этиб сайланганини тасдиқлади ва унинг инаугурациясини 20 январга белгилади. Трамп овоз бериш якунларидан ҳамон норози бўлса-да, ваколатларни сайланган президентга топширишга тайёрлигини эълон қилди.

Бир қатор демократ сиёсатчилар Трампни ўз тарафдорларини зўравонликка гижгижлашда айблади. Амалдаги АҚШ президенти энг йирик ижтимоий тармоқларда вақтинчалик ёки доимий равишда блокланди, унинг маъмуриятидаги ўнга яқин ходим истеъфо берди.

Вакиллар палатаси спикери, Демократлар партияси аъзоси Нэнси Пелоси вице-президентдан Трампни ҳокимиятдан четлатишни талаб қилди. Акс ҳолда Пелоси Трампга нисбатан импичмент жараёнини бошлаш билан таҳдид қилди.