Ўзбекистонда 2021 йил бошидан бери 16 471 киши ички паспорти ўрнини эгаллайдиган идентификацион карта (ID-карта) олишга улгурди. Бу ҳақда Миграция ва фуқароликни расмийлаштириш бош бошқармаси бошлиғи ўринбосари Дилшодбек Муродбеков АОКАда ўтказилган матбуот анжуманида маълум қилди.
Фото: ИИВ матбуот хизмати
«2021 йил бошидан 12 январь санасига қадар 16 471 нафар Ўзбекистон фуқароларига, 62 нафар республика ҳудудида доимий яшовчи чет эл фуқароларига, 21 нафар фуқаролиги бўлмаган шахсларга ID-карта расмийлаштириб берилган», — дейди Муродбеков.
Шунингдек, Муродбековнинг айтишича, 2020 йилда 8310 нафар фуқаролиги бўлмаган шахсга Ўзбекистон фуқаролиги берилган.
«2020 йилда Ўзбекистон Президентининг 17 та фармонига асосан 8310 нафар фуқаролиги бўлмаган шахс Ўзбекистон фуқаролигига қабул қилинди ва 141 нафар фуқаролиги бўлмаган шахснинг Ўзбекистон фуқаролигига қабул қилиш ҳақидаги илтимосномалари қаноатлантирилмасдан қолдирилди», — дейди ИИВ вакили.
Маълумот учун, Ўзбекистон Президентининг 72 та фармонига асосан жами 18 631 нафар фуқаролиги бўлмаган шахс Ўзбекистон фуқаролигига қабул қилинган. Жумладан, 2016 йилда — 179 нафар, 2017 йилда — 1064 нафар, 2018 йилда — 2760 нафар, 2019 йилда — 6318 нафар шахсга Ўзбекистон фуқаролиги тақдим этилган.
«Кўрсаткичлардан кўриниб турибдики, йилдан йилга фуқароликка қабул қилинаётганларнинг сони ошиб бормоқда. 1992 йилдан 2016 йилга қадар республика бўйича жами 482 нафар фуқаролиги бўлмаган шахс Ўзбекистон фуқаролигига қабул қилинган», — дейди Миграция ва фуқароликни расмийлаштириш бош бошқармаси бошлиғи ўринбосари.
Аввалроқ ИИВ Фуқароликни расмийлаштириш ва миграция бошқармаси бошлиғи, полковник Улуғбек Муҳаммедов 2020 йилда президентнинг 16 та фармонига асосан 7419 нафар фуқаролиги бўлмаган шахс Ўзбекистон Республикаси фуқаролигига қабул қилинганини билдирган эди.
Бундан ташқари, матбуот анжуманида маълум қилинишича, 2020 йил давомида 543 173 нафар Ўзбекистон фуқаросига хорижга чиқиш биометрик паспорти расмийлаштириб берилган.
Эслатиб ўтамиз, 2021 йилнинг 1 январидан ўзбекистонликлар фақат «қизил паспорт» билан мамлакат ташқарисига чиқиш мумкин.
