Самарқанд вилояти Каттақўрғон тумани «Дўстлик» маҳалласида бир оиланинг беш нафар аъзоси ис газидан заҳарланди, ҳодиса оқибатида уч нафар бола вафот этган. Бу ҳақда Бош прокуратура маълум қилди. Аввалроқ бу оила «номаълум этиологияли заҳарланишдан зарарлангани» ҳақида хабар берилган эди.
Суд тиббиёт экспертизасининг бирламчи маълумотига кўра, оиланинг вояга етмаган уч нафар аъзоси — икки нафар қиз, бир нафар ўғил бола — С.П. (ўғил бола, 2012 йилда туғилган), М.П. (қиз бола, 2016 йилда туғилган), Ш.П. (қиз бола, 2019 йилда туғилган) ис газидан заҳарланиш оқибатида вафот этган.
Оила бошлиқлари — 1986 йилда туғилган Д.Ж. ва 1991 йилда С.О.га ис газидан заҳарланиш ташхиси билан зарур тиббий муолажалар кўрсатилмоқда. Бош прокуратура ахборотида қайд этилишича, ота-она ҳам, уч нафар бола ҳам 12 январь куни соат 10:00 атрофида «яшаш уйи хонасидан ис газидан заҳарланиш аломатлари билан яқин қариндошлари томонидан топилган».
«Мазкур ҳолат юзасидан Каттақўрғон туман прокуратураси томонидан терговга қадар текширув ҳаракатлари олиб борилмоқда», — дейилади Бош прокуратура ахборотида.
Қайд этиш жоиз, бу ис газидан заҳарланиш оқибатида йил бошидан бери юз берган ўлим билан боғлиқ жамоатчиликка маълум бўлган дастлабки ҳолат эмас. Аввалроқ, 8 январь куни Сирдарё вилоятида эр-хотин, 4 январь куни Хоразм вилоятида она ва унинг 10 ёшли қизи ис газидан заҳарланиб ҳалок бўлган эди.
Ис газидан заҳарланиш бир муаммо бўлса, газ портлаши билан боғлиқ ҳолатлар алоҳида масала. Йил бошидан бери камида иккита шундай ҳодиса қайд этилди — 6 январь куни Қаршида юз берган ҳодиса оқибатида икки бола ҳалок бўлди, 8 январь куни Хивада содир бўлган портлаш сабаб бир қиз вафот этди.
Изоҳ (0)