«Амалдорларнинг қандай соат тақишигача назорат қилиш лозим». Бош вазир ўринбосарлари — даромадлар декларациясига доир қонун лойиҳаси ҳақида

Коррупцияга қарши курашиш агентлиги амалдорларнинг даромадлари декларация қилинишини назарда тутувчи қонун лойиҳасини ишлаб чиқди. 2019 йилда Бандлик ва меҳнат муносабатлари тайёрлаган қонун лойиҳасидан фарқли ўлароқ (вазирлик лойиҳаси бўйича, ушбу тартиб 2020 йил 1 январдан жорий этилиши керак эди), агентлик таклиф қилаётан лойиҳада қуйидан тортиб юқоригача бўлган барча мансабдорлар — ҳатто президент ва бош вазир ҳам декларация тўлдириши таклиф қилинган. Ҳужжат лойиҳаси ижтимоий тармоқларда қизғин муҳокама қилинмоқда.

«Дарё» мухбири Миролим Исажонов ушбу масала юзасидан бош вазирнинг икки нафар ўринбосарига мурожаат қилиб, уларнинг фикри билан қизиқди.

«Декларацияни кўрсатмаса, ишдан четлашиши керак» — Азиз Абдуҳакимов, бош вазир ўринбосари — Туризмни ривожлантириш давлат қўмитаси раиси

«Бу қонун лойиҳасидан нега хавотирланаман? Менда умуман хавотир йўқ. Бу жуда бир тўғри ҳолат. Ҳамма, агар давлат ташкилотида ишласа, ўзининг декларациясини қилиши керак. Одамлар ҳам кўриши лозим: қайси амалдор қандай ҳаёт кечирмоқда, қаердан қандай даромад кўрмоқда ва ўз маблағларини қаерга сарфламоқда. Агар буни кўрсатгиси келмаса, давлат ишидан четлашиб, ўзининг бизнеси ёки бошқа иши билан шуғулланиши керак. Қонун чиққач, Ўзбекистоннинг барча фуқароси унга тўлиқ бўйсуниб, риоя этиши лозим».

«Харажатлар декларациясини ҳам жорий қилиш лозим» — Сардор Умурзоқов, бош вазир ўринбосари — инвестициялар ва ташқи савдо вазири

«Мазкур қонун лойиҳасига амалдор сифатида муносабатим жуда ижобий. Бу тартиб бутун дунёда мавжуд. Даромадлар декларацияси биринчи босқич бўлса, иккинчи босқичда айрим мамлакатларда бор бўлган ҳолат — харажатлар декларациясини ҳам жорий қилиш керак. Даромад декларацияси коррупциянинг олдини олиш ва амалдорларнинг масъулиятини оширишга жуда катта ҳисса қўшади.

Шу билан бирга биз барибир бориб-бориб, амалдорларнинг харажатларини ҳам назоратга олишимиз керак. Уларни қандай уйда яшаяпти, қандай машина сотиб олди, кечирасизу, масалан, қандай кийим кийиб юргани-ю, қандай соат тақишигача назорат қилиш лозим. Бунга ҳам жуда тезкорлик билан етиб боришимиз керак.

Анча вақт аввал, тўрт йил давомида Буюк Британияда яшаб, ишлаганим боис бу тажрибалар ва талаблар менга бегона эмас, жуда таниш. Ушбу тизим коррупция билан курашда энг катта фойда берадиган чоралардан бири, деб ҳисоблайман. Даромад декларациясини тўлдириб, эълон қилиш менга муаммо туғдирмайди, бунга тайёрман».