O‘zbekistonda 16 mingdan ortiq fuqaroga ID-karta rasmiylashtirib berildi — IIV Migratsiya bo‘limi

O‘zbekistonda 2021-yil boshidan beri 16 471 kishi ichki pasporti o‘rnini egallaydigan identifikatsion karta (ID-karta) olishga ulgurdi. Bu haqda Migratsiya va fuqarolikni rasmiylashtirish bosh boshqarmasi boshlig‘i o‘rinbosari Dilshodbek Murodbekov AOKAda o‘tkazilgan matbuot anjumanida ma’lum qildi.

“2021-yil boshidan 12-yanvar sanasiga qadar 16 471 nafar O‘zbekiston fuqarolariga, 62 nafar respublika hududida doimiy yashovchi chet el fuqarolariga, 21 nafar fuqaroligi bo‘lmagan shaxslarga ID-karta rasmiylashtirib berilgan”, — deydi Murodbekov.

Shuningdek, Murodbekovning aytishicha, 2020-yilda 8310 nafar fuqaroligi bo‘lmagan shaxsga O‘zbekiston fuqaroligi berilgan.

“2020-yilda O‘zbekiston Prezidentining 17 ta farmoniga asosan 8310 nafar fuqaroligi bo‘lmagan shaxs O‘zbekiston  fuqaroligiga qabul qilindi va 141 nafar fuqaroligi bo‘lmagan shaxsning O‘zbekiston fuqaroligiga qabul qilish haqidagi iltimosnomalari qanoatlantirilmasdan qoldirildi”, — deydi IIV vakili.

Ma’lumot uchun, O‘zbekiston Prezidentining 72 ta farmoniga asosan jami 18 631 nafar fuqaroligi bo‘lmagan shaxs O‘zbekiston fuqaroligiga qabul qilingan. Jumladan, 2016-yilda — 179 nafar, 2017-yilda — 1064 nafar, 2018-yilda — 2760 nafar, 2019-yilda — 6318 nafar shaxsga O‘zbekiston fuqaroligi taqdim etilgan.

“Ko‘rsatkichlardan ko‘rinib turibdiki, yildan yilga fuqarolikka qabul qilinayotganlarning soni oshib bormoqda. 1992-yildan 2016-yilga qadar respublika bo‘yicha jami 482 nafar fuqaroligi bo‘lmagan shaxs O‘zbekiston  fuqaroligiga qabul qilingan”, — deydi Migratsiya va fuqarolikni rasmiylashtirish bosh boshqarmasi boshlig‘i o‘rinbosari.

Avvalroq IIV Fuqarolikni rasmiylashtirish va migratsiya boshqarmasi boshlig‘i, polkovnik Ulug‘bek Muhammedov 2020-yilda prezidentning 16 ta farmoniga asosan 7419 nafar fuqaroligi bo‘lmagan shaxs O‘zbekiston Respublikasi fuqaroligiga qabul qilinganini bildirgan edi.

Bundan tashqari, matbuot anjumanida ma’lum qilinishicha, 2020-yil davomida 543 173 nafar O‘zbekiston fuqarosiga xorijga chiqish biometrik pasporti rasmiylashtirib berilgan.

Eslatib o‘tamiz, 2021-yilning 1-yanvaridan o‘zbekistonliklar faqat “qizil pasport” bilan mamlakat tashqarisiga chiqish mumkin.