АҚШ Конгресси Вакиллар палатаси мамлакатнинг амалдаги президенти Дональд Трампга импичмент эълон қилиш масаласини кўриб чиқишни бошлади, дея хабар қилмоқда Meduza.
Тахминларга кўра, бир соат ичида конгрессменлар давлат раҳбарини лавозимидан четлаштириш тўғрисидаги мунозаралар тартибини муҳокама қиладилар, сўнгра икки соат ичида импичмент бўйича мунозаралар бўлиб ўтади, деб ёзди парламент мухбири Жейми Дюпри Twitter’да.
Трампни лавозимидан четлаштириш бўйича овоз бериш Тошкент вақти билан 14 январь соат 1:00 да бошланади.
Эслатиб ўтамиз, Трамп 2021 йил 6 январь воқеаларида айбланмоқда.
Трамп тарафдорлари Капитолийга бостириб кириши оқибатида келиб чиққан тўқнашувларда тўрт киши ҳалок бўлди. Бундан ташқари, тартибсизликлар пайтида яраланган полициячи кейинчалик касалхонада вафот этди.
Вакиллар палатаси 12 январь куни вице-президент Майк Пенсни АҚШ конституциясига 25-тузатишни қўллаш орқали Трампни лавозимидан четлатишга чақирган. Пенс Вакиллар Палатасидаги овоз бериш жараёнидан олдин буни рад этиб келаётган эди.
Агар Вакиллар Палатаси Трампни лавозимидан олиб ташлашга овоз берса, Сенат (Америка Конгрессининг юқори палатаси) қарорни маъқуллаши керак. Агар сенат буни 20 январгача – Трампнинг ваколат муддати тугагунига қадар амалга оширса, у бошқа ҳеч қачон АҚШ президентлигига номзодини кўрсата олмайди.
Изоҳ (0)