AQSh Kongressi Vakillar palatasi mamlakatning amaldagi prezidenti Donald Trampga impichment e’lon qilish masalasini ko‘rib chiqishni boshladi, deya xabar qilmoqda Meduza.
Taxminlarga ko‘ra, bir soat ichida kongressmenlar davlat rahbarini lavozimidan chetlashtirish to‘g‘risidagi munozaralar tartibini muhokama qiladilar, so‘ngra ikki soat ichida impichment bo‘yicha munozaralar bo‘lib o‘tadi, deb yozdi parlament muxbiri Jeymi Dyupri Twitter’da.
Trampni lavozimidan chetlashtirish bo‘yicha ovoz berish Toshkent vaqti bilan 14-yanvar soat 1:00 da boshlanadi.
Eslatib o‘tamiz, Tramp 2021-yil 6-yanvar voqealarida ayblanmoqda.
Tramp tarafdorlari Kapitoliyga bostirib kirishi oqibatida kelib chiqqan to‘qnashuvlarda to‘rt kishi halok bo‘ldi. Bundan tashqari, tartibsizliklar paytida yaralangan politsiyachi keyinchalik kasalxonada vafot etdi.
Vakillar palatasi 12-yanvar kuni vitse-prezident Mayk Pensni AQSh konstitutsiyasiga 25-tuzatishni qo‘llash orqali Trampni lavozimidan chetlatishga chaqirgan. Pens Vakillar Palatasidagi ovoz berish jarayonidan oldin buni rad etib kelayotgan edi.
Agar Vakillar Palatasi Trampni lavozimidan olib tashlashga ovoz bersa, Senat (Amerika Kongressining yuqori palatasi) qarorni ma’qullashi kerak. Agar senat buni 20-yanvargacha – Trampning vakolat muddati tugaguniga qadar amalga oshirsa, u boshqa hech qachon AQSh prezidentligiga nomzodini ko‘rsata olmaydi.
Mavzuga doir:
Izoh (0)