Хитойнинг Ҳарбин вилоятидан ўтувчи юзасини муз қоплаган Сангхуа дарёсида 300 дан зиёд «муз қазувчилар» тонг отмасдан иш бошлайди. Қишки фестиваль учун қурилаётган муз иншоотлари ҳақида Reuters фоторепортаж тайёрлади.
Музёрар асбоблар билан қуролланган ишчилар бир километр кенгликдаги дарё юзасини қоплаган муздан йирик бўлакларни кесиб олади.
У ердагиларнинг аксарияти қурилиш ишчилари ёки фермерлардир. Улар тиззагача резина этик, эгнига куртка ва қалин қўлқоп кийиб, совуқ урмаслиги учун қулоғига телпагини бостириб олади.
«Муз қазиш учун ҳар куни эрталаб соат 6 да келамиз», — дейди 40 ёшли Зенг Вай. «Баъзан белгиланган вақтдан ортиқ ишлашга тўғри келади, 8-9 гача, ҳатто ярим тундан ҳам ўтиб кетади».
Тушлик шоҳона эмас — бир коса иссиқ макарон, хамирли дўлма ёки буғда пиширилган булочка. Ёғоч устунлар ва полиэтилендан ясалган чодир шаклидаги ошхоналарда бироз исиниш мумкин.
Декабрь бошидан бери дарёдан ҳар куни ўн минглаб муз бўлаги юк машиналари ёрдамида Ҳарбиндаги ҳар йили қишки фестиваль ўтказиладиган жойга ташилади. У ерда муздан қасрлар, ибодатхоналар, кўприк ва ҳатто емакхоналар ҳам қурилади.
Дарё музининг аҳамияти ниҳоятда катта.
«Сунъий муз бунчалик қалин эмас, шамолга бардош беролмайди», — дейди 20 йилдан бери фестиваль учун музга ишлов бериб келаётган Уанг Кюшинг.
Ташкилотчилар фестивалгача ҳайкалларни тезроқ битказиш учун кимўзарга беллашади, майдон форклифт, кран ва исканаларга тўлиб кетади.
Муз бўлаклари эҳтиёткорлик билан бир-бирининг устига ётқизиларкан, ишчилар уларни арра билан қирқиб, айрисимон ва тишсимон ускуналар ёрдамида шаклга солиб сайқаллайди.
37-Ҳарбин халқаро муз-қор фестивалида чанғида учиш, сузиш мусобақалари ва тўй маросимлари ўтказилади. Рангли чироқларга чўмган муз ҳайкалларидан иборат парк эса фестивалга ўзига хос кўрк беради.
Коронавирус туфайли Хитой халқаро чегаралари қатъий чеклов остида турибди. Шунинг учун келгуси ой -35 даражали ҳавода муз ҳайкалларини кўришга келадиган меҳмонлар асосан маҳаллий сайёҳлар бўлиши кутилмоқда.
Изоҳ (0)