6 январь куни авторақамлар онлайн-аукционида Самарқанд вилоятига тегишли авторақамлардан бири 250 миллион 875 минг сўмга сотилди.
«Kun.uz»нинг ёзишича, Самарқанд вилоятига тегишли 30 О 010 ОО авторақамига 66 миллион 900 минг сўм бошланғич нарх белгиланган. Харидорлар унинг нархини 4 баробар ошириб юборган. Таъкидланишича, уни сотиб олган харидор воситачилик йиғими учун қарийб 10 миллион сўм тўлайди.
Бундан икки кун аввал, 4 январь куни ўтказилган савдолардан бирида Самарқанд вилоятига тегишли бўлган 30 Z 777 ZZ авторақами рекорд нархда сотилган эди. Ўша куни харидорлардан бири мазкур авторақамни 596 миллион 525 минг сўмга сотиб олди. Қайд этилишича, мазкур авторақамнинг бошланғич нархи 111 миллион 500 минг сўм бўлган. Савдо жараёнида харидорлар томонидан унинг нархи 10о мартадан ошиқроқ кўтарилган.
Маълумот учун, 250 миллион 875 минг сўмга сотилган авторақам Ўзбекистонда сотилган авторақамлар орасида нарх борасида учинчи ўринни эгаллайди. Ундан юқори нархга баҳоланган иккита авторақам ҳам Самарқанд вилоятига тегишли ҳисобланади. 2017 йилнинг 1 ноябрь куни Самарқандда истиқомат қилувчи тадбиркор уни 287 миллион сўмга 30 777 ААА авторақамини сотиб олганди.
Аввалроқ Ўзбекистонда ўтган бир йил ичида 262,6 миллиард сўмлик чиройли авторақамлар сотилгани тўғрисида хабар берилганди.
Эслатиб ўтамиз, авторақамларни онлайн-аукционларда сотилишидан келиб тушган маблағларнинг 80 фоизи давлат бюджетига, 20 фоизи Ички ишлар вазирлигининг моддий-техник базасини ривожлантириш, ходимларини моддий рағбатлантириш ва бошқа харажатлар махсус жамғармасига йўналтирилади.
Изоҳ (0)