Бағдод суди Эрон генерали Қосим Сулаймоний ўлдирилиши бўйича тергов доирасида АҚШнинг амалдаги президенти Дональд Трампни ҳибсга олишга ордер берди, деб хабар бермоқда Ассоcиатед Пресс.
Таъкидланишича, Сулаймоний ва у билан бирга вафот этган Ироқ халқ сафарбарлик кучлари қўмондони ўринбосари Абу Маҳди ал-Муҳандиснинг ўлдирилиши олдиндан режалаштирилган деб ҳисобланади. Ироқ қонунчилигига кўра, қасддан одам ўлдиришда айбдор деб топилганлар ўлим жазосига ҳукм қилинади.
Ассоcиатед Пресс қайд этишича, Трамп президентлигининг сўнгги кунларида эълон қилинган Ироқ судининг қарори рамзий маънога эга.
Эслатиб ўтамиз, Эрон Ислом инқилоби муҳофизлари корпуси (ИИМК) генерали Қосим Сулаймоний ва Ироқ халқ сафарбарлик кучлари қўмондони ўринбосари Абу Маҳди ал-Муҳандис 2020 йил 3 январь куни АҚШ ҳаво кучлари томонидан Бағдод аэропортига берилган авиаҳужум оқибатида ўлдирилганди. Зарба АҚШ президенти Дональд Трамп фармойишига асосан берилган.
Бунга жавобан Эрон Ироқдаги Америка базасига ҳужум қилган. Бунинг оқибатида 100 дан ортиқ америкалик жароҳатланганди.
Изоҳ (0)