Хонанда Жасур Умиров вояга етмаган Ш.М.нинг номусига теггани юзасидан 2020 йилнинг 9 октябрь куни Самарқанд вилояти ИИБ ҳузуридаги Тергов бошқармаси томонидан жиноят иши қўзғатилиб, қамоққа олинган эди.
Самарқанд вилояти прокуратурасининг «Дарё»га маълум қилишича, жиноят иши тергови якунланиб, 5 январь куни Жиноят ишлари бўйича Самарқанд вилояти судига юборилган. Олий суднинг қайд этишича, ушбу суд ёпиқ тарзда ўтказилади.
Таъкидланишича, Жиноят кодексининг 118-моддаси (номусга тегиш) 3-қисми «а» банди билан айбланган Жасур Умировга оид жиноят иши жиноят ишлари бўйича Самарқанд вилояти судига келиб тушган.
Шу билан бирга, ушбу жиноят иши доирасида А.З. ва Ш.Қ. ҳам Жиноят кодексининг 238-моддаси (ёлғон гувоҳлик бериш) 1-қисми ва 241-моддаси (жиноят ҳақида хабар бермаслик ёки уни яшириш) 2-қисми билан айбланиб судга берилган.
Мазкур жиноят иши бўйича айбланувчи Жасур Умировга «қамоққа олиш» тарзидаги эҳтиёт чораси, айбланувчилар А.З. ва Ш.Қ.га «гаров» эҳтиёт чоралари қўлланилган.
Жиноят иши 2021 йил 6 январь куни Жиноят-процессуал кодексининг 391-моддаси (жиноят ишининг ҳудудий жиҳатдан судловга тегишлилиги) тартибида, яъни жиноят содир этилган ҳудуддаги жиноят ишлари бўйича Каттақўрғон шаҳар судига мазмунан кўриб чиқиш учун юборилган.
Ушбу жиноят иши Жиноят-процессуал кодексининг 19-моддаси 1-қисми (жинсий жиноятлар тўғрисидаги ишлар кўрилаётган суд) талабларига мувофиқ ёпиқ тарзда кўриб чиқилади.
Ишни кўриб чиқиш натижалари бўйича алоҳида баёнот берилиши маълум қилинган.
Аввалроқ бу иш бўйича хонанда Самарқанд вилояти Каттақўрғон туманида лицейнинг биринчи курсини эндигина тамомлаган, вояга етмаган қизнинг номусига теггани, ИИБ эса хонандага нисбатан жиноий иш очишни рад этгани, Бош прокуратура қарор қонунийлигини текшириши маълум қилинганди. Шундан сўнг Бош прокуратура мазкур ҳолат бўйича қўшимча текширув тайинлангани ҳақида хабар берганди.
Изоҳ (0)