Наманганда ароқдан заҳарланиш оқибатида вафот этганлар сони беш кишига етди. Бу ҳақда «Дарё» мухбири хабар бермоқда.
Олдинроқ вилоятнинг Тўрақўрғон туманида 2020 йил охирларида 12 нафар фуқаро ўткир заҳарланиш ташхиси билан шифохонага ётқизилгани, уларнинг икки нафари вафот этгани ҳақида хабар берилганди.
«Дарё» мухбирининг аниқлик киритишича, Тўрақўрғон туманидаги «Соҳилобод» маҳалласида яшовчи саккиз нафар йигит Янги йил арафасидаги байрам дастурхонида қўлбола ароқдан заҳарланиб, 2020 йил 31 декабрь куни соат 08:10 да туман тиббиёт бирлашмасининг реанимация бўлимига олиб келинган.
2021 йилнинг дастлабки кунлари эса туманнинг бошқа маҳаллаларида яшовчи яна беш нафар фуқаро алкоголь суррогатидан заҳарланиш ташхиси билан шифохоналарга ётқизилган. Шу тариқа, заҳарланганларнинг умумий сони 13 кишига етган, улардан бири Мингбулоқ туман тиббиёт бирлашмасига олиб борилган.
Кўрсатилган тиббий муолажаларга қарамай, заҳарланганлардан дастлаб икки, кейинчалик уч нафари ҳаётдан кўз юмди. Уларнинг энг каттаси 52, энг кичиги эса 36 ёшда бўлган.
Туман тиббиёт бирлашмаси бошлиғи Дилмурод Исмоиловнинг айтишича, ҳозирда олти нафар бемор соғайиб, уйига жавоб берилган, икки нафари эса реанимация бўлимида оғир аҳволда қолмоқда.
«Дастлабки хулосаларга қараганда, заҳарланиш ‘Градусник’ номли қўлбола спиртли ичимлик истеъмолидан келиб чиққан. Зудлик билан аҳоли ўртасида тушунтириш ишлари олиб борилгани туфайли бошқа бундай ҳолатлар юз бермади»,— дейди Дилмурод Исмоилов.
Туман прокурори Элёрбек Талабоевга кўра, ушбу ҳолат юзасидан жиноят иши очилган, ҳозирда тергов ҳаракатлари олиб борилмоқда.
Изоҳ (0)