Пальтоларни тўғри сақлаш бўйича 5 та оддий маслаҳат (фото)

Сифатли ҳамда урфга мос пальто танлаш аслида қийин. Кейинчалик уларни тўғри сақлай олиш ҳам муҳим масалалардан бири ҳисобланади. Пальтоларни ҳамиша янги ва яхши кўринишда сақлаб қолиш учун қуйидаги оддийгина 5 та маслаҳат фойдали бўлиши мумкин.

Кучли қор ва ёмғирдан сўнг пальтолар ҳам ҳўл бўлиши табиий. Уни қуритиш учун эса бироз осиб қўйиш кифоя. Агарда намлик ўта юқори даражада бўлса, намликни ютадиган қоғоз сочиқлар устига қўйиб чиқиб, сўнгра осиб қўйиш керак.

Пальтога қаҳва ёки бошқа бир суюқлик тўкилиб кетса, ўша заҳоти уни тозалаш керак. Бунинг энг яхши усули эса кимёвий тозалаш хизматларига мурожаат қилиш. Унга қадар совунли сув билан ҳам тозалаш мумкин. Лекин бу унчалик ҳам самара бермайди. Аралашма тўғридан-тўғри зарарланган жойда қўлланилиши керак. Шундан сўнг чангдан тозалайдиган ускунада тозалаш зарур. Агар пальто матоси жуда тез чанг тортса, унда ёпишқоқ юзага эга чўтка ёрдам беради.

Пальто юзасида мунтазам ишқаланиш унинг матосида думалоқ тўпчалар пайдо бўлишига ёки ситилишига ҳам олиб келади. Кичкина думалоқ мато тўпчаларини тозаловчи махсус қурилма мавжуд бўлиб, ундан фойдаланиш пальтони яна аввалги ҳолатига қайтаради. Шунингдек, қайчидан ҳам фойдаланиш мумкин, аммо бу бироз кўп вақтни олади ва тўсатдан пальто матосига зарар етказиш эҳтимоли ҳам мавжуд.

Жун матоли пальто деярли ғижим бўлмайди. Агарда унда қандайдир бурмалар ҳосил бўлса, намлик юқори бўлган хонага илиб қўйиш зарур. Масалан, ҳаммомда кун давомида намлик юқори бўлса, у ерга илиш тавсия этилади.

Жун матоли пальтоларни дазмоллаш мумкин, фақатгина дока билан. Агар пальто устида чизиқлар пайдо бўлса, уни пахта билан артиш ёки дазмол буғида ушлаб туриш мумкин.