Чиройли кўриниш қора доғлар ва ҳуснбузарларсиз тоза юздан бошланади. Қуйидаги профессионал жараёнлар эса шундай натижага эришишга ёрдам беради.
Ҳар кунги стресс, носоғлом овқатланиш, атроф-муҳит омилларининг салбий таъсири, ҳаводаги чанг, токсинлар, пардоз қолдиқлари тери секрецияси билан аралашиб, тешикларни аста-секин тўсиб қўяди. Бу эса юз рангининг хиралашуви ва эрта қаришига олиб келади. Юзни мунтазам тўғри тозалаш терининг ёрқинлигини тиклаш ва гўзалликка янгидан қайтишга ёрдам беради. Замонавий косметология терининг турига ва беморнинг эҳтиёжларига қараб, юз тозаловчи воситаларни танлашга имкон беради. Юз тозалаш муолажасини қуйидаги турларга ажратиш мумкин:
- Механик;
- Қурилма ёрдамида (ультратовуш, вакуум, қурилма техникаси ёрдамида);
- Кимёвий.
Ушбу муолажа ёғли тери, ҳусбузар ва тери тешиклари тиқилиб қолган мижозларда қўлланилади. Шуни таъкидлаш керакки, ушбу муолажада шикаст етиши эҳтимоли кўпроқ. Кўпгина мутахассислар бу усулни аллақачон эскирган, деб билади. Сабаби бугунги кунда камроқ шикаст етказадиган ҳамда реабилитация учун кўп вақт талаб этмайдиган тозалаш турлари мавжуд.
Қурилма ёрдамида тозалаш
Қурилма ёрдамида тозалашнинг бир қанча вариантлари мавжуд:
Ультратовушли тозалаш
Махсус қурилма ёрдамида косметолог терининг муаммоли жойларида юқори частотали товуш қўлқини билан ҳаракат қилади. У чанг, ёғли тиқинлар, косметик воситаларнинг қолдиқларини тешиклардан чиқариб юборади. Шунингдек, ўлик ҳужайраларни ҳам олиб ташлайди. У билан бирга амалга ошириладиган микромассаж тери тўқимларида қон айланишини яхшилайди. Аммо бунинг ўзига яраша камчилиги шундаки, чуқур қора тешиклар тозаланмай қолиб кетиш эҳтимоли мавжуд. Ижобий томони − шикаст етказмайди ва реабилитация талаб этилмайди.
Вакуумли тозалаш
Ушбу жараён худди чангютгич каби теридаги кирларни чиқариб ташлайди. Вакуумли тозалаш юмшоқ ва оғриқсиз кечади. Терида тирналиш ҳолатлари кузатилмайди. Ушбу жараён ҳужайраларни кислород билан таъминлайди ва тери ҳолатини яхшилайди. Аммо яллиғланган ҳуснбузар, қуруқ сезувчан тери, дерматоз ва томирларнинг кенгайиши кузатилган ҳолатларда қўллаш мумкин эмас.
Карбонли пилинг
Карбонли пилинг зарарланган қатламни олиш, терини силлиқлаш, соғлом терини тиклаш ва юздаги доғларни йўқ қилишга ёрдам беради. Қўшимча равишда корбон плёнкаси яллиғланиш ва микробларга қарши таъсирга эга. Лазер таъсирида теридаги патоген муҳит йўқ қилинади. Карбон пилинг оғриқсиз муолажа бўлиб, бироз кўпроқ вақт талаб этади.
Кимёвий тозалаш
Бу кимёвий таркиб ёрдамида ўлик тери ҳужайраларини йўқ қилишни ўз ичига олган кометик муолажадир. Жараёндан сўнг тери силлиқ ва текис бўлади, юзнинг аввалги кўринишига нисбатан ҳолати яхшиланади. Ушбу жараённи тўғри ўтишида шифокор тажрибаси ҳам муҳим рол ўйнайди. Шундагина муолажадан кейин юз териси турли хил асоратлар билан азобланмаслик мумкин.
Шуни унутмаслик керакки, тери гўзаллиги, аввало, ичкаридан бошланади. Шунинг учун биринчи навбатда овқатланиш ва соғлом турмуш тарзига эътибор бериш керак. Кейингина уй шароитида тўғри парвариш ва косметик воситалардан фойдаланиш ҳам яхши натижани кўрсатади.
Изоҳ (0)