NASA мутахассислари Кеннеди космик марказида Astrobotic Technology компанияси томонидан ишлаб чиқарилган CubeRover кичик планетоходини синовдан ўтказди, деб хабар беради «Korrespondent.net».
Таъкидланишича, Ой юзасини имитация қилиш учун ўлчами оёқ кийим қутисидек келадиган тўрт ғилдиракли аппарат устига 120 тоннали контейнер ўрнатилган. NASA экспертлари CubeRover’нинг манёврчанлигини, шунингдек, унинг датчиги, двигатель ва чангли шароитда қувватланиш тизимини баҳолаган. Умумий ҳисобда ровер ҳаракатланиш бўйича 150 дан ортиқ тестларни бажариб кўрган.
Astrobotic Technology аппарати ёрдамида агентлик Ойдаги илмий, тадқиқот ва тижорий фаолиятини кенгайтириш ниятида.
«CubeRover енгил, тахминан 4 килограмм келади. Уларни яратиш ва ишга тушириш — нисбатан арзон. Бу эса парвозлар қийматини сезиларли даражада камайтириб, CubeRovers’ни намойишкорона миссиялар учун ажойиб платформага айлантиради», — дейди Astrobotic Technology’нинг планетар мобиллик бўйича директори Майк Провенсано.
Унинг сўзларига кўра, роверни 2024 йилга — NASA’нинг Артемис миссиясига қадар тўлиқ тайёрлаш керак бўлади.
Аввалроқ NASA Ойга элтувчи энг қисқа йўлни патентлаганди. 2020 йилнинг июль ойида эса NASA ва Япония АҚШнинг Артемис дастури бўйича ҳамкорликда ишлаш тўғрисидаги келишувни имзолаган. Шунингдек, имзоланган янги келишувга Россиянинг киритилмаслиги АҚШ томонидан 2020 йилнинг май ойида маълум қилинганди.
Мавзуга доир: Nokia компанияси Ойда 4G интернетни ишга туширади
Изоҳ (0)