NASA’да Boston Dynamics томон яратилган Spot роботининг модификацияга учраган версияси — сунъий интеллектга эга тўрт оёқли Аu-Spot роботи тақдим этилди. Олимлар тўрт оёқли робот «Қизил сайёра»да автоном ҳаракатлана олиши учун уни сунъий интеллект ва сенсор қурилмалар жамланмаси билан жиҳозлайди, деб хабар беради «Korrespondent.net».
Тахминларга кўра, робот-итлар Spirit, Opportunity, Curiosity ва Perseverance марсоходларидан кўра, манёврларни яхшироқ бажара олади.
Янги роботларнинг манёврчанлиги ва барқарорлиги датчиклар билан бирлаштирилган бўлиб, бу уларга турли тўсиқлардан қочиш, бир нечта йўлдан бирини танлаш, уй базасида операторлар учун чуқур туннел ҳамда ғорларнинг виртуал харитасини қуришга ёрдам бериш имконини тақдим этади.
Анъанавий марсоходлар, асосан, силлиқ юзалар билан кифояланади, бироқ кўплаб илмий фаразларга кўра, Марснинг қизиқарли томонлари турли паст-баландлик ёки ер остида жойлашган. Робот-итлар бу каби вазифаларга мос келади — улар йиқилиб тушган тақдирда ҳам қайта оёққа туриб олишга қодир.
«Марс-ити» замонавий марсоходлардан, тахминан, 12 баробар енгил бўлади ва тезроқ ҳаракатлана олади — соатига 5 километр. Тадқиқотчиларнинг маълум қилишича, Curiosity марсоходи Марс юзасида соатига 0,14 километр тезликда ҳаракатланади.
Аu-Spot атрофдаги барча нарсаларни кўплаб датчиклар ёрдамида сканер қилади. Маълумотлар борт компьютери ёрдамида қайта ишланади ва «Марс-ити»га атрофдаги буюмларни 3D ҳолатда тақдим этади.
Аввалроқ Hyundai роботлар ишлаб чиқарувчи Boston Dynamics’нинг асосий эгасига айлангани тўғрисида хабар берилганди.
Эслатиб ўтамиз, Boston Dynamics’нинг робот-ити 74,5 минг доллардан сотувга чиққан, шунингдек, у Сингапур боғида одамлар орасидаги оралиқ масофани текширишни бошлаган.
Изоҳ (0)