«Жиззахча тендерлар-2». Бир неча юз млрд сўмлик лойиҳаларни вилоят ҳокими ўринбосарининг қариндошлари қўлга киритгани маълум бўлди

Telegram’даги «Давлетовуз» канали Давлат харидлари портали маълумотларига таяниб Жиззах вилоят ҳокими Эргаш Солиевнинг қизига тегишли компания 2 миллиард сўмлик лойиҳаларни қўлга киритганини маълум қилган. Коррупцияга қарши курашиш агентлиги бу борада ўрганишлар ўтказиб, натижалари бўйича ОАВ ва кенг жамоатчиликка батафсил маълумот берилишини билдирганди.

26 декабрь куни канал «Жиззахча тендерлар-2» сарлавҳали янги суриштирувни эълон қилди. Унга кўра, Жиззах вилояти ҳокимининг саноатни ривожлантириш, капитал қурилиш, коммуникациялар, коммунал хўжалик масалалари бўйича ўринбосари Раҳмонқулов Акрам Баҳриддиновичнинг қариндошлари ижтимоий ва бошқа соҳа объектларини қуриш бўйича бир неча юз миллиард сўмлик давлат буюртмаларини қўлга киритган. Қизиғи, Акрам Раҳмонқулов ўзи қариндошлари ютган тендерларда комиссия раиси сифатида ваколатли шахс бўлган.

Очиқ манбалардаги маълумотлар асосида ўтказилган суриштирувлар вилоятдаги аксарият давлат буюртмалари Акрам Раҳмонқуловнинг қариндошлари дея тахмин қилинаётган шахсларга тегишли хусусий компаниялар ўртасидаги тақсимлаб олинган бўлиши мумкинлигини кўрсатган.

1. Раҳмонқулов Акбар Баҳриддинович 100 фоиз улушга эгалик қиладиган ҳамда Раҳмонқулов Алишер Баҳриддинович раҳбарлик қиладиган «Ж-Қурувчи» МЧЖ «Давлетовуз» ҳисоб-китобига кўра, 120 миллиард сўмдан ортиқ давлат буюртмаларини қўлга киритган. Унда айтилишича, Акбар Баҳриддинович Раҳмонқулов данакли ва пўчоқли уруғи бўлган мевалар етиштириш билан шуғулланадиган «Қўниш Бобо Махсус Боғлари» МЧЖ, бетондан қурилиш учун буюмлар ишлаб чиқариш билан шуғулланадиган «Зенаткор Темир Бетон Буюмлари» МЧЖнинг (корхонага Раҳмонқулов Адҳам Баҳриддинович раҳбарлик қилади) тўлиқ таъсисчисидир.
2. Баҳриддинов Шуҳратжон Акрамович тўлиғича таъсисчи бўлган «Қурилиш Таъминоти» МЧЖ ҳам камида 80 миллиард сўмлик давлат буюртмаларини тендерда «ютиб олган». Шуҳратжон Раҳмонқулов 1997 йилдан бери ишлаб келадиган «Камол» хусусий корхонаси эгаси экани ҳам айтилган. Бу компания ҳам вилоятда катта қурилишлардаги иштироки билан танилган.
3. Тошпўлатов Ихтиёр Бахтиёрович тўлиқ таъсисчиси бўлган «Абдувоҳид Қурилиш Таъмир» МЧЖ 61 миллиард сўмга яқин давлат буюртмаларини тендер асосида, шунингдек, тўғридан-тўғри (манзилли дастурлар асосида) қўлга киритган. Тошпўлатов Ихтиёр Бахтиёрович ҳам она тарафдан Раҳмонқуловларга қариндош бўлиши мумкинлиги айтилмоқда.
4. Раҳмонқулов Алишер Баҳриддинович тўлиқ эгалик қиладиган «Жиззах Савдо Люкс» МЧЖ яшашга яроқсиз жойларни ижарага бериш ва бошқариш билан, унинг яна бир компанияси — «Равон Йўл Инвест» МЧЖ эса тошни кесиш, ишлов бериш ва пардозлаш билан шуғулланади. Яъни, бу оилага тегишли аксарият корхоналар қурилиш билан алоқадор.

Вилоят бўйича тасдиқланган манзилли қурилиш дастурларида юқоридаги компаниялар аллақачон ижрочи сифатида ҳам кўрсатиб ўтилган ҳолатлар мавжуд.

«Қурилиш буюртмаларида бевосита иштирок этмаса-да, ‘Зенаткор Темир Бетон Буюмлари’ МЧЖ ҳамда ‘Равон Йўл Инвест’ МЧЖ давлат бюджетидан қурилаётган иншоотларда таъминотчилар сифатида иштирок этаётган бўлиши мумкин. Буни фақат назорат органлари текшируви орқали аниқлаш мумкин, агар шунга хоҳиш бўлса, албатта», — дейилади хабарда.

Аввалроқ Андижонда давлат буюртмаларини буюртмачининг ўзига тегишли компаниялар тақсимлаб олгани маълум бўлганди. Хусусан, «Ягона буюртмачи хизмати» ИК раҳбари Муҳиддин Қодиров ўзига тегишли бўлган Milano Biznes Servis МЧЖга қарийб 20 миллиард сўмлик қурилишга оид давлат буюртмаларини олган.