Ўзбекистон ва Қирғизистоннинг йирик шаҳарлари ўртасида халқаро автобус қатновини йўлга қўйиш имконияти кўриб чиқилмоқда, деб хабар бермоқда Инвестициялар ва ташқи савдо вазирлиги матбуот хизмати.
Бу ҳақда 24 декабрь куни Ўзбекистон бош вазири ўринбосари — инвестициялар ва ташқи савдо вазири Сардор Умурзоқовнинг Қирғизистон бош вазири вазифасини бажарувчиси, бош вазир биринчи ўринбосари Артём Новиков билан ўтказган видеоконференция шаклида кенгайтирилган музокараларида айтиб ўтилган.
Кун тартибининг асосий мавзуси сифатида алоҳида йўналишлар бўйича аввал тузилган қўшма ишчи гуруҳлар доирасида савдо, саноат кооперацияси, қишлоқ хўжалиги, транспорт коммуникациялари ва бошқа соҳаларда икки томонлама ҳамкорликни фаоллаштириш масалалари муҳокама қилинган.
Мулоқот чоғида транспорт, логистика соҳасида стратегик шерикликни янада ривожлантириш ва мустаҳкамлашнинг устуворлиги таъкидланди. Ҳаво ташувларининг қайта тикланиши ижобий баҳоланиб, Ўзбекистон ва Қирғизистон йирик шаҳарлари ўртасида халқаро автобус қатновини йўлга қўйиш имкониятлари муҳокама қилинган. Шунингдек, транспорт соҳасидаги қатор лойиҳалар бўйича ҳамкорликни фаоллаштириш, жумладан, «Хитой—Қирғизистон—Ўзбекистон» темир йўл йўлагини яратиш лойиҳасини амалга оширишни жадаллаштириш масалалари кўриб чиқилган.
Президентнинг «Илм, маърифат ва рақамли иқтисодиётни ривожлантириш йили» давлат дастурига оид фармони лойиҳасида Ўзбекистонда 2020 йилда 10 та халқаро ва 114 та маҳаллий янги автобус йўналиши очилиши кўзда тутилганди.
Аввалроқ Тошкент—Омск, Самарқанд—Тошкент—Санкт-Петербург, Фарғона—Олмаота йўналишларида мунтазам автобус қатновлари йўлга қўйилгани ҳақида хабар берилган эди.
Изоҳ (0)