Ўзбекистонда бугунги кунда 9875 нафар маҳалла профилактика инспекторлари фаолият олиб бормоқда. Ҳар 4 профилактика инспекторига 1 нафардан катта профилактика инспектори бириктирилган.
«Kun.uz»нинг маълум қилишича, бу ҳақда Қонунчилик палатасидаги «Адолат» СДП фракциясининг Маъмурий жавобгарлик тўғрисидаги кодексига ўзгартишлар киритиш орқали бир қатор масалаларнинг маъмурий судлардан профилактик инспекторларига ўтказилишига бағишланган йиғилишда ИИВ бошқарма бошлиғи Раҳим Наимов айтиб ўтган.
Йиғилишда депутатлар томонидан маъмурий ишларни кўриб чиқиш учун бугунги кунда маҳаллаларда хизмат олиб бораётган профилактика инспекторларининг салоҳияти нечоғлик етарли эканлиги, бу борада маълум таҳлиллар ўтказилганлигини исботловчи рақамларнинг йўқлиги ҳамда профилактика инспекторлари томонидан расмийлаштирилган жарималар давлат бюджетига тушмаслиги танқид остига олинган.
Шунингдек, ушбу норма қабул қилингач, бу йўналишдаги фаолият ҳар бир профилактика инспекторининг шахсий кўрсаткичларига таъсир этиши таъкидланган. Ҳозирги 400-500 та маъмурий ҳолатларда аҳолига ёрдам бериб, эртага ҳар бир инспектор шахсий кўрсаткичи учун биттадан бундай ҳолатни расмийлаштирган тақдирда ҳам ўн минглаб фуқароларни қамраб олиши мумкинлиги айтилган.
Депутатлар томонидан билдирилган эътирозларга жавобан ИИВ бошқарма бошлиғи Раҳим Наимов бугунги кунда Ўзбекистонда 9875 нафар маҳалла профилактика инспекторлари фаолият олиб бораётгани, уларнинг ҳар 4 нафарига 1 нафардан катта профилактика инспектори бириктирилганлигини айтиб ўтган.
У бу йўналишда шаффофликни таъминлаш учун Хитойдан 690 доллардан планшетлар харид қилинаётганлигини маълум қилган.
«Мазкур планшетлар фақатгина жавобгарнинг бармоқ излари мониторга босилган тақдирдагина маъмурий баённомалар расмийлаштиради. Бугунги кунгача Наманган, Самарқанд ва Тошкент вилояти профилактика инспекторлари ушбу турдаги планшетлар билан таъминланган», — деган Наимов.
Изоҳ (0)