Alibaba асосчиси Жек Ма монополияга қарши текширув ортидан бир кунда 3,5 млрд доллар йўқотди

Alibaba компанияси акциялари Хитой интернет-гигантга нисбатан монополияга қарши текширув бошлагани ҳақидаги хабарлардан кейин 11 фоизга тушиб кетди, деб ёзади «РБК». Нью-Йорк фонд биржасида савдолар бошида қоғозларнинг нархи 227,1 долларгача пасайди. 23 декабрь кунги савдолар ёпилишида Alibaba қимматли қоғозлари қиймати 256,18 долларга тенг бўлди. Компания капитализацияси 23 декабрдаги савдолар якунларига кўра, 694,65 миллиард доллардан 24 декабрь куни 614,5 миллиард долларгача қисқарди.

Alibaba Group’га нисбатан монополияга қарши текширув бошлангани ҳақида 24 декабрь куни Давлат бозорини тартибга солиш бошқармаси (SАМR) маълум қилганди. Текширув бошлашга компания томонидан Alibaba платформасини қўллайдиган сотувчиларга босим ўтказилаётгани ҳақидаги хабарлар асос бўлди. Хусусан, Alibaba шерикларини ҳамкорлик тўғрисидаги эксклюзив шартномаларни имзолашга мажбур қилиши, улар сотувчиларнинг маҳсулотларни рақобатчи майдонларда таклиф қилишига йўл қўймаслиги маълум бўлди.

Хитой Халқ банки мамлакат молия регуляторлари яқин орада Alibaba’нинг шўъба корхонаси — Аnt Group молиявий технология компанияси вакиллари билан учрашишини эълон қилди.

Монополияга қарши текширув ўтган ой режалаштирилган, Аnt молиявий технология компаниясининг 34,4 миллиард доллар акцияларини биринчи марта жойлаштириш тўсатдан тўхтатиб қўйилганидан кейин юз берди. Бу дунёдаги энг йирик акциялар жойлаштирилуви бўлиши керак эди, аммо Шанхай ва Гонконгда акциялар савдоси бошланишига атиги икки кун қолганида блоклаб қўйилган эди. IPO’нинг амалга ошмай қолишига компаниянинг листинг талабларига жавоб бермаслиги ва ахборотни фош қилгани сабаб бўлган бўлиши мумкин.

Тарихдаги энг йирик IPO’ни блоклаб қўйиш қарори Alibaba Group раҳбари Жек Ма ҳам Хитой, ҳам халқаро молиявий регуляторларининг халқаро қоидаларини танқид қилганидан кейин бир неча кун ўтиб қабул қилинган эди.

Энг бадавлат хитойлик миллиардерлардан бири Жек Ма ўз компанияси Alibaba’нинг акциялари пасайиб кетиши ортидан бир кунда 3,5 миллиард доллардан зиёд пул йўқотди.

Forbes Real-Time рейтинги маълумотларига кўра, Жек Манинг давлати 24 декабрь кунги савдолар ёпилишида 57,3 миллиард долларга баҳоланган. У бир кеча-кундузда йўқотган қиймат 3,6 миллиард долларга тенг. Бизнесмен рейтингнинг 19-поғонасини эгаллаб турибди.