Бугун,

  • USD 10940.05
  • RUB 182.26
  • EUR 11121.65

Ўзбекистон Монополияга қарши қўмитаси ҳузуридаги Истеъмолчилар ҳуқуқларини ҳимоя қилиш агентлиги Ucell уяли алоқа оператори томонидан деярли 338 минг абонентга нисбатан қонунбузарликлар аниқлаган. Умумий зарар 97,4 миллион сўмдан ошди, деб хабар бермоқда бошқарма матбуот хизмати.

Текширув ишлари алоқа оператори абоненти бу ҳақда мурожаат қилганидан сўнг бошланган. Истеъмолчи уяли алоқа оператори унинг ҳисобидан 420 сўм ечиб олингани тўғрисида SMS-хабар олган. Аризачи «Ал-Чироқ» акцияси иштирокчиси бўлиб, унга тармоқда дақиқалар, SMS-тўпламлар ёки интернет трафик 84 сўмдан тақдим этилган. Ушбу хизмат бир неча кундан бери мавжуд эмаслигига қарамай, пул абонент ҳисобидан ечиб олинишда давом этган.

Вазиятни ўрганиш учун агентлик COSCOM МЧЖга хат юборган. Маълум бўлишича, ушбу акция иштирокчилари кунлик абонент тўлови эвазига махсус ариза орқали кунига битта хизматни 1 сўмдан, 25 августдан эса 84 сўмдан олиш имкониятига эга бўлган.

30 сентябрдан 4 октябргача бўлган даврда иловада носозлик содир бўлган, шунинг учун 337 900 абонент акция шартларида кўзда тутилган хизматлардан фойдалана олмаган. Шу билан бирга, уларнинг ҳисоб рақамларидан 97,4 миллион сўмлик фойдаланилмаган хизмат учун пул ечиб олинган.

«Истеъмолчиларнинг ҳуқуқларини ҳимоя қилиш тўғрисида»ги қонуннинг 21-моддасига биноан, сотувчи истеъмолчини ҳақ эвазига қўшимча товарлар сотиб олишга ёки қўшимча хизматлардан фойдаланишга ундашга, шунингдек, кўрсатилмаган хизматлар учун ҳақ олишга ҳақли эмас.

Маълум қилинишича, носозлик сабабли абонентлар ҳисобдан ечиб олинган маблағлар тўлиқ қайтариб берилган.

Аввалроқ Beeline Uzbekistan «Хабардор бўл» акцияси бўйича абонентларга етказилган зарарни тўлашни бошлагани ҳамда Ўзбекистондаги алоқа компаниялари истеъмолчиларга 22,5 миллиард сўмдан кўпроқ зарар етказгани ҳақида хабар берилганди.

Изоҳ
Асосий янгиликлар