Япония ҳукуматнинг Иқтисодий ва ижтимоий ривожланиш дастури доирасида Ўзбекистонга қиймати 800 миллион иена (7,3 миллион доллар) бўлган йўл қуриш техникасини бепул тақдим этди. Бу ҳақда Япониянинг Ўзбекистондаги элчихонаси матбуот хизматига таяниб, «Gazeta.uz» хабар берди.

Техникаларни топшириш маросими 18 декабрь куни бўлиб ўтган. Маросимда Япония элчиси Ёшинори Фужияма ва Ўзбекистон транспорт вазири ўринбосари, Автомобиль йўллари қўмитаси раиси Абдураҳмон Абдувалиев иштирок этган.

Маълум қилинишича, Японияда ишлаб чиқарилган 16 та йўл таъмирлаш техникаси, шу жумладан, битта йўл текисловчи, иккита бир барабанли каток, учта тандемли каток, тўртта пневматик шинали каток ва бошқа машиналар Сирдарё, Жиззах, Хоразм вилоятлари ва Қорақалпоғистоннинг қишлоқ ҳудудларига етказиб берилади.

Элчихона хабарида айтилишича, мазкур ҳудудлардаги кўплаб йўлларга шу пайтгача қоплама ётқизилмаган, шу сабабли йилнинг илиқ фаслларида кучли ёмғирлар юзага келтирадиган сув тошиши, кўчки билан боғлиқ ҳолатлар, совуқ ойларда эса йўлнинг музлаб қолиши билан боғлиқ муаммолар учрайди. Табиий офатлардан кейин тезда таъмирлаш ва қайта тиклаш қишлоқ жойларида иқтисодий ва ижтимоий барқарорликни таъминлаш учун муҳим вазифа ҳисобланади.

Янги техникалардан фойдаланиш санаб ўтилган ҳудудларда йўл қуриш ишларини муқобиллаштириш ва ишлар учун кетадиган вақтни қисқартиришга ёрдам бериши кутилмоқда.