Қўйлиқда фоҳишалик қилувчи аёл мижоз сифатида келган эркакнинг телефони ва 500 долларини тунаб кетди

Тошкентнинг Бектемир туманида фоҳишалик қилувчи аёл мижоз сифатида келган эркакнинг телефони ва 500 долларини талон-торож қилди. Бу ҳақда ИИВ Тергов департаменти хабар берди.

Маълум бўлишича, 11 декабрь куни, тахминан, соат 23:30 да, икки нафар номаълум шахс ўзгалар мулкини талон-торож қилиш мақсадида олдиндан тил бириктириб, Тошкент шаҳар, Бектемир тумани, Compas савдо марказининг орқа тарафидаги Истиқлол кўчасида 24 ёшли Тоҳиржон А.ни ҳаёти ва соғлиғи учун хавфли бўлмаган зўрлик ишлатиб, унга тегишли бўлган баҳоси 100 долларлик бир дона Redmi-5 Plus русумли телефон ва 500 доллар нақд пулларини очиқдан очиқ талон-торож қилиб, ҳодиса жойидан яширинган.

Ҳолат юзасидан Бектемир тумани бўйича ИИО ФМБ ҳузуридаги Тергов бўлими томонидан номаълум шахсларга нисбатан Жиноят кодексининг 166-моддаси 2-қисми «а,в» бандлари (бир гуруҳ шахслар томонидан олдиндан тил бириктириб ҳаёт ва соғлиқ учун хавфли бўлмаган зўрлик ишлатиб талончилик содир этиш) билан жиноят иши қўзғатилган.

Олиб борилган тергов тадбирлари натижасида 17 декабрь куни 18 ёшли Акбархўжа У. 23 ёшли Умид Х. ва Фарғона вилоятида туғилган 34 ёшли Рухсорахон Х. ушбу жиноятни содир этганликда гумон қилиниб ушланган. Сўроқ жараёнида аниқланишича, фоҳишалик фаолияти билан шуғулланувчи 34 ёшли Рухсорахон Х. мижоз сифатида келган фуқаро Тоҳиржон А. билан гаплашиб турган вақтида, унинг ёнида телефон аппарати ва пуллари борлигини кўриб қолиб, бу ҳақда танишлари Умид Х. ва Акбархўжа У.га маълумот берган. Сўнг қоронғи ва овлоқ жойда Умид Х. ва Акбархўжа У. ўзларининг талончилик режасини амалга оширган.

Дастлабки тергов жараёнида Акбархўжа У. Рухсорахон Х. ва Умид Х. Жиноят кодексининг 164-моддаси 2-қисми «а,б» бандлари (бир гуруҳ шахслар томонидан олдиндан тил бириктириб, қурол ёки қурол сифатида фойдаланиш мумкин бўлган бошқа нарсаларни ишлатиб босқинчилик қилиш) билан айбланувчи тариқасида ишда иштирок этишга жалб қилингани ҳамда уларга нисбатан қамоққа олиш тарзидаги, Рухсорахон Х.га эса муносиб хулқ-атворда бўлиш тўғрисидаги тилхат эҳтиёт чораси қўлланилган.

Ҳозирда тергов ҳаракатлари олиб борилмоқда.