Навоий вилоятида 500 МВт қувватга эга шамол электр станциясини қуриш ва эксплуатация қилиш бўйича инвестиция шартномаси Ўзбекистон Президентининг 22 декабрдаги фармони билан тасдиқланди, деб хабар бермоқда «Gazeta.uz».
Ушбу лойиҳани амалга ошириш бўйича келишув БААнинг Masdar компанияси (Аbu Dhabi Future Energy Company) томонидан январь ойида имзоланган. Ўша вақтда электр станцияси қуввати 400 МВтни ташкил этиши айтилганди. Қурилишга 600 миллион доллар миқдоридаги тўғридан-тўғри хорижий инвестициялар жалб этилади.
Инвестицион лойиҳани амалга ошириш мақсадида Masdar Ўзбекистонда Shamol Zarafshan Energy лойиҳа компаниясини ташкил этган.
Июнь ойида «Ўзбекистон миллий электр тармоқлари» ва Masdar электр энергиясини сотиб олиш тўғрисида битим имзоланган бўлиб, унга мувофиқ Shamol Zarafshan Energy Ўзбекистонда ишлаб чиқарилган электр энергиясини кафолатланган тарзда сотиб олиш мажбуриятини олган. Бу ҳақда Президентнинг 22 декабрдаги фармонида белгиланган.
Кейинчалик лойиҳа компанияси ва «Ўзбекистон миллий электр тармоқлари» инвестиция лойиҳасини амалга ошириш учун халқаро мустақил инжиниринг компаниясини танлаб олади.
Йил бошида ушбу объект 2022 йилда фойдаланишга топшириши режалаштирилгани маълум қилинганди.
Эслатиб ўтамиз, БААнинг Masdar компанияси, шунингдек, Навоий вилоятида умумий қуввати 100 МВт бўлган фотоэлектр станцияси қуради. У 2021 йилдан бошлаб Ўзбекистоннинг электр тармоқларини энергия билан таъминлашни бошлаш кутилмоқда.
Изоҳ (0)