Сурхондарёда соғлиқни сақлаш, халқ таълими ва транспорт бошқармаси раҳбарлари ўзгарди

Сурхондарё вилоятининг соғлиқни сақлаш, халқ таълими ва транспорт бошқармаларига янги раҳбар тайинланди. Бу ҳақда ЎзА хабар берди.

Соғлиқни сақлаш бошқармасига шу кунгача Сурхондарё вилояти кўп тармоқли тиббиёт маркази бош шифокори лавозимида ишлаб келган Абдувоҳидов Комил Муртазоевич бошлиқ этиб тайинланди.

Комил Абдувоҳидов 1965 йил 1 сентябрда Жарқўрғон туманида туғилган. 1989 йилда Самарқанд давлат тиббиёт институтини тамомлаган. Мутахассислиги — жарроҳ.

Комил Абдувоҳидов Термиз шаҳар марказий шифохонаси анестезиолог-реаниматологи, гемодиализ бўлими бошлиғи, Республика шошилинч тиббий ёрдам илмий маркази Термиз филиали директори, вилоят соғлиқни сақлаш бошқармаси бошлиғининг биринчи ўринбосари, бошқарма бошлиғи, «Сино Мед Термиз» масъулияти чекланган жамияти клиникаси раҳбари лавозимларида фаолият юритган.

Халқ таълими вазирлигининг кадрларни тайёрлаш, қайта тайёрлаш ва малакасини ошириш бўлими бош мутахассиси Ҳамидова Сулув Янгибоевна Сурхондарё вилояти халқ таълими бошқармаси бошлиғи лавозимида иш бошлади.

Сулув Ҳамидова 1969 йилда Шўрчи туманида туғилган. 1990 йилда Тошкент халқ хўжалиги институтини тамомлаган. Иқтисодиёт фанлари номзоди, доцент.

Меҳнат фаолияти давомида Сулув Ҳамидова Термиз давлат университети ўқитувчиси, катта ўқитувчиси, молия-иқтисодиёт факультети декани ўринбосари, Термиз туманидаги Янгиариқ қишлоқ хўжалик касб-ҳунар коллежи директори, ТерДУ қошидаги Термиз академик лицейи директори, «Адолат» социал демократик партияси вилоят кенгаши раиси, Тошкент давлат иқтисодиёт университети доценти лавозимларида ишлаган.

«Сурхон саноат қурилиш инвест» қурилиш-ишлаб чиқариш корхоналари бирлашмаси раисининг биринчи ўринбосари Қувватов Чори Жўраевич Сурхондарё вилояти транспорт бошқармаси бошлиғи лавозимига тайинланди.

Чори Қувватов 1981 йилнинг 30 июлида Қумқўрғон туманида туғилган. 2002 йилда Тошкент молия институтини тамомлаган. Маълумоти бўйича мутахассислиги — бухгалтерия ҳисоби ва аудит.

Чори Қувватов «Ўзсаноатқурилишбанк»нинг Тошкент вилояти минтақавий филиали бўлим бошлиғи, шўъба мудири, Қибрай филиали бошқарувчиси ўринбосари, Шарғун филиали бошқарувчиси, Сурхондарё вилояти минтақавий филиали бошлиғи, шунингдек, Марказий банкнинг Сурхондарё вилояти бош бошқармаси бошлиғи лавозимларида меҳнат қилган.