Андижонда 233 мингдан ортиқ аҳоли ишлаш учун хорижга чиқиб кетгани маълум қилинди

Андижон вилоятида 2020 йилнинг 1 декабрь ҳолатига кўра, 233 минг 98 нафар фуқаро ишлаш учун хорижга чиқиб кетган. Бу ҳақда вилоят ҳокими Шуҳрат Абдураҳмонов вилоят аҳолисига қилган мурожаатномасида маълум қилди, дея хабар берди «Дарё» мухбири.

Таъкидланишича, мигрантларнинг 206 минг 194 нафари хорижга асосан ишлаш учун кетган бўлса, 3081 нафари эса таълим жараёнидан ажралмаган ҳолда меҳнат фаолиятини амалга ошираётганлар ҳисобланади. Қолган 26 904 нафар фуқаро эса бошқа мақсадларда хорижга чиқиб кетган. Меҳнат мигрантларининг 52 фоизи Россия, 32 фоизи Қозоғистон, 2,5 фоизи Жанубий Корея ва 13,5 фоизи эса бошқа давлатларда яшаб, меҳнат қилмоқда.

«Жорий йил бошидан буён 52 минг 872 нафар фуқаро хориждан қайтиб келган бўлиб, уларнинг 12 минг 359 нафари хотин-қизлар, 10 минг 756 нафари эса ёшларни ташкил этган», — дейилади ҳоким мурожаатномасида.

Қайд этилишича, сектор раҳбарлари томонидан амалга оширилган ишлар натижасида 42 минг 655 нафар чет элдан қайтганларнинг бандлиги таъминланган. Қолган 10 минг 217 нафар фуқаролардан 7 минг 139 нафари ўз ихтиёрига кўра ишлашни истамаганлиги, соғлигини тиклаш жараёнидалиги, бола парвариши ҳамда нафақа ёшига етганлиги сабабли ишга жойлаштирилмаган. Қолган 3 минг 78 нафар хориждан қайтган мигрантларни иш билан таъминлаш ишлари олиб борилмоқда.

«Хорижда ишлаш истагида бўлган фуқароларга қулай шароит ва имконият яратишга алоҳида эътибор қаратяпмиз. Яқинда Андижон шаҳар Боғишамол даҳасида жойлашган ижтимоий-иқтисодиёт ва педагогика коллежи негизида 20 дан зиёд йўналишдаги қисқа муддатли касб-ҳунар ва хорижий тиллар бўйича таълим берувчи аҳолини касб-ҳунарга ўқитиш маркази фойдаланишга топширдик. Марказда таҳсил олган фуқароларга малакали мутахассис сифатида халқаро сертификат берилади ва хорижий давлатлардаги юқори маошли иш ўринларига ишга жойлаштирилади. Ҳозирда меҳнат мигрантларининг оқими юқори бўлган Россиянинг нуфузли, йирик иш берувчилари билан ҳамкорлик йўлга қўйилмоқда. Хусусан, вилоят делегацияси Россиянинг Москва шаҳри, Оренбург вилояти, Байкалорти ўлкаларида бўлиб, ушбу ҳудудлар билан меҳнат миграцияси масалаларида ҳудудлараро ҳамкорлик алоқалари ўрнатилди. Ҳамкорлардан 13,5 мингдан зиёд мутахассисларга бўлган эҳтиёж тўғрисида талабномалари олинди. Бундан ташқари, Чехия, Словакия, Польша, Жанубий Корея давлатлари билан ҳам музокаралар олиб борилмоқда», — деди Шуҳрат Абдураҳмонов.

Қўшимча қилинишича, айни пайтга қадар вилоят бўйича 5 минг 785 нафар малака ва тажрибага эга, хорижда ишлаш истагида бўлган фуқароларнинг манзилли рўйхати шакллантирилган. Уларнинг 685 нафарини ташкиллаштирилган тартибда хорижда шартнома асосида иш билан таъминлашга эришилган.