Саудия Арабистони бир қатор мамлакатларда янги коронавирус штамми аниқлангандан сўнг чегараларни ёпди ва халқаро парвозларни тўхтатди, дея хабар қилмоқда «РБК».
Янги чекловлар ушбу вируснинг хусусияти ҳақидаги маълумотлар аниқ бўлгунга қадар, ҳозирча бир ҳафта мобайнида амал қилади. Вазиятга қараб бу муддат узайтирилиши мумкин.
Қайд этилишича, Саудия Арабистони ҳукумати қуйидаги чекловларни жорий қилди:
- халқаро парвозлар тўхтатилади, қиролликка хориждан аллақачон етиб келган рейслар мамлакатни тарк этиши мумкин;
- қуруқлик ва денгиз чегаралари вақтинча ёпилади;
- Европа мамлакатларидан ёки коронавируснинг янги штамми аниқланган ҳар қандай давлатдан қайтиб келган фуқаролар икки ҳафта давомида ўзини изоляциялаши ва ҳар беш кунда бир марта COVID-19 тестини топшириши керак;
- сўнгги уч ой ичида Европадан ёки янги коронавирус тури пайдо бўлган мамлакатдан қайтиб келганлар учун тест топшириш ҳам мажбурийдир.
Маълумот учун, Саудия Арабистонидан ташқари яна 20 дан ортиқ мамлакат янги штамм туфайли авиақатновларни чеклади
Эслатиб ўтамиз, Буюк Британияда коронавируснинг янги тури аниқлангани, шу туфайли мамлакатнинг айрим ҳудудларида касаллик тарқалиш суръати тезлашгани ҳақида 14 декабрь куни маҳаллий Соғлиқни сақлаш вазирлиги раҳбари Мэтт Хенкок маълум қилди. Буюк Британия бош вазири Борис Жонсоннинг сўзларига кўра, ушбу турдаги коронавирус аввалгиларидан 70 фоизга юқумлироқ лекин ундан хавфлироқ эмас.
Жаҳон соғлиқни сақлаш ташкилоти 20 декабрь куни Британияникига ўхшаш коронавирус Нидерландия, Дания ва Австралияда ҳам аниқланганини эълон қилди. Ҳозирда ташкилот бу штамми ўрганмоқда.
Аввалроқ Жанубий Африка Республикаси (ЖАР)да ҳам ўхшаш мутациядаги вирус топилгани ҳақида хабар берилган эди. Вируснинг янги варианти ҳозирги вакциналар ҳосил қиладиган иммунитетдан кучлироқ бўлиши мумкин, деган тахминлар учун ҳозирча бирор бир асос йўқ. Буюк Британия 8 декабрь куни Ғарб мамлакатлари орасида биринчилардан бўлиб коронавирусга қарши Pfizer ва BioNTech компаниялари томонидан ишлаб чиқилган дори воситаси билан оммавий вакцинация қилишни бошлаган эди.
Европанинг бир қатор мамлакатлари — Нидерландия, Бельгия, Австрия ва Италия кабилар Буюк Британия билан авиақатновларни тўхтатишини эълон қилиб улгурди. Ирландия, Франция ва Германия, шунингдек, Исроил ҳам шундай қарор қабул қилиш масаласини кўриб чиқмоқда. Bild нашри маълумотларига кўра, Германия канцлери Ангела Меркель Европа Иттифоқидаги ҳамкасблари билан Буюк Британиядан Евроиттифоққа парвозларни 20 декабрь оқшомидан то 2021 йил 6 январигача мувофиқлаштирилган ҳолда тақиқлаш бўйича келишишни режалаштирмоқда. Бундан ташқари, Европа Иттифоқи ва ЖАР ўртасидаги авиақатновлар чекланиши, Буюк Британия билан темир йўл ва паром алоқаси ҳам тўхтатилиши мумкин, дея ёзмоқда Meduza.
