Andijon viloyatida 2020-yilning 1-dekabr holatiga ko‘ra, 233 ming 98 nafar fuqaro ishlash uchun xorijga chiqib ketgan. Bu haqda viloyat hokimi Shuhrat Abdurahmonov viloyat aholisiga qilgan murojaatnomasida ma’lum qildi, deya xabar berdi “Daryo” muxbiri.
Ta’kidlanishicha, migrantlarning 206 ming 194 nafari xorijga asosan ishlash uchun ketgan bo‘lsa, 3081 nafari esa ta’lim jarayonidan ajralmagan holda mehnat faoliyatini amalga oshirayotganlar hisoblanadi. Qolgan 26 904 nafar fuqaro esa boshqa maqsadlarda xorijga chiqib ketgan. Mehnat migrantlarining 52 foizi Rossiya, 32 foizi Qozog‘iston, 2,5 foizi Janubiy Koreya va 13,5 foizi esa boshqa davlatlarda yashab, mehnat qilmoqda.
“Joriy yil boshidan buyon 52 ming 872 nafar fuqaro xorijdan qaytib kelgan bo‘lib, ularning 12 ming 359 nafari xotin-qizlar, 10 ming 756 nafari esa yoshlarni tashkil etgan”, — deyiladi hokim murojaatnomasida.
Qayd etilishicha, sektor rahbarlari tomonidan amalga oshirilgan ishlar natijasida 42 ming 655 nafar chet eldan qaytganlarning bandligi ta’minlangan. Qolgan 10 ming 217 nafar fuqarolardan 7 ming 139 nafari o‘z ixtiyoriga ko‘ra ishlashni istamaganligi, sog‘ligini tiklash jarayonidaligi, bola parvarishi hamda nafaqa yoshiga yetganligi sababli ishga joylashtirilmagan. Qolgan 3 ming 78 nafar xorijdan qaytgan migrantlarni ish bilan ta’minlash ishlari olib borilmoqda.
“Xorijda ishlash istagida bo‘lgan fuqarolarga qulay sharoit va imkoniyat yaratishga alohida e’tibor qaratyapmiz. Yaqinda Andijon shahar Bog‘ishamol dahasida joylashgan ijtimoiy-iqtisodiyot va pedagogika kolleji negizida 20 dan ziyod yo‘nalishdagi qisqa muddatli kasb-hunar va xorijiy tillar bo‘yicha ta’lim beruvchi aholini kasb-hunarga o‘qitish markazi foydalanishga topshirdik. Markazda tahsil olgan fuqarolarga malakali mutaxassis sifatida xalqaro sertifikat beriladi va xorijiy davlatlardagi yuqori maoshli ish o‘rinlariga ishga joylashtiriladi. Hozirda mehnat migrantlarining oqimi yuqori bo‘lgan Rossiyaning nufuzli, yirik ish beruvchilari bilan hamkorlik yo‘lga qo‘yilmoqda. Xususan, viloyat delegatsiyasi Rossiyaning Moskva shahri, Orenburg viloyati, Baykalorti o‘lkalarida bo‘lib, ushbu hududlar bilan mehnat migratsiyasi masalalarida hududlararo hamkorlik aloqalari o‘rnatildi. Hamkorlardan 13,5 mingdan ziyod mutaxassislarga bo‘lgan ehtiyoj to‘g‘risida talabnomalari olindi. Bundan tashqari, Chexiya, Slovakiya, Polsha, Janubiy Koreya davlatlari bilan ham muzokaralar olib borilmoqda”, — dedi Shuhrat Abdurahmonov.
Qo‘shimcha qilinishicha, ayni paytga qadar viloyat bo‘yicha 5 ming 785 nafar malaka va tajribaga ega, xorijda ishlash istagida bo‘lgan fuqarolarning manzilli ro‘yxati shakllantirilgan. Ularning 685 nafarini tashkillashtirilgan tartibda xorijda shartnoma asosida ish bilan ta’minlashga erishilgan.
Izoh (0)