Британияда коронавируснинг янги штамми сентябрда пайдо бўлиб, ноябрь ўрталаридан фаол тарқалишни бошлаган

Коронавируснинг янги штамми Буюк Британияда сентябрда пайдо бўлган бўлиши мумкин, аммо ноябрь ўрталарида фаол тарқалишни бошлаган. Бу ҳақда мамлакат Жамоатчилик соғлиғини сақлаш хизмати баёнотига таяниб, «РБК» хабар бермоқда.

Олимлар генетик маълумотлардан фойдаланиб, коронавирус тарқалиши занжирини тескари тартибда ўрганиб чиқиб, фуқаролар уни кимдан юқтирганлигини аниқлашга уринди.

«Коронавируснинг бу тури сентябрда пайдо бўлган, ноябрь ўрталаригача унга жуда кам одамлар чалинган. Коронавируснинг айнан янги вариант билан боғлиқ касалланиш ҳолатларининг ўсиши биринчи марта ноябрь охирларида қайд этилди, ўшанда Жамоатчилик соғлиғини сақлаш хизмати жорий қилинган чекловларга қарамай, Кент графлигида касалланиш даражаси пасаймаётгани сабабини аниқлаган эди. Кейинроқ биз коронавируснинг бу вариант Лондонда ва Эссекс графлигида тез тарқалаётганини аниқладик», — дейилади хабарда.

Коронавируснинг янги тури тезроқ тарқалади, лекин у касалликнинг оғирроқ кечишига олиб келиши ёки у билан боғлиқ ўлим даражаси юқори бўлиши борасида ҳозирча далиллар йўқ, дея таъкидламоқда олимлар. Бундан ташқари, Pfizer компаниясининг коронавирусга қарши вакцинаси унга қарши қанчалик самарали эканлиги ҳам ҳозирча номаълум. Буюк Британия ундан фойдаланишни декабрь бошида маъқуллаган эди.

Буюк Британия Соғлиқни сақлаш вазирлиги коронавируснинг янги тури аниқлангани ҳақида 14 декабрь куни маълум қилган эди. Англия бош санитар шифокори Крис Уитти бу турдаги вирус «одатий» SARS-CoV-2’дан кўра тезроқ тарқалаётганини қайд этди. Буюк Британия бош вазири Борис Жонсоннинг сўзларига кўра, коронавируснинг янги генетик вариант 70 фоизга юқумлироқ бўлиши мумкин.

Инфекциянинг янги штамми аниқлангани муносабати билан Англия жануби-шарқида, хусусан, Лондонда 20 декабрдан эътиборан чекловларнинг юқори, тўртинчи даражаси жорий этилди, ҳозирча бу тартиб яқин икки ҳафта амалда бўлади. Унга кўра, маҳаллий аҳоли ўта заруратсиз уйдан чиқиши, шунингдек, Янги йил байрамига тантаналарига бир неча оила бўлиб тўпланиши мумкин эмас. Хавфнинг тўртинчи даражаси эълон қилинган ҳудудларда фақат дорихоналар ва биринчи зарурат дўконлари ишлайди. Худди шундай чекловлар 20 декабрдан Уэльсда, 26 декабрдан эса Шотландияда ҳам жорий этилади. Янги чекловлар ҳақида эълон қилиниши билан лондонликлар шаҳарни оммавий тарзда тарк эта бошлади, дея хабар бермоқда Sky News.

Европанинг бир қатор мамлакатлари — Нидерландия, Бельгия, Австрия ва Италия кабилар Буюк Британия билан авиақатновларни тўхтатишини эълон қилиб улгурди. Ирландия, Франция ва Германия, шунингдек, Исроил ҳам шундай қарор қабул қилиш масаласини кўриб чиқмоқда. Bild нашри маълумотларига кўра, Германия канцлери Ангела Меркель Европа Иттифоқидаги ҳамкасблари билан Буюк Британиядан Евроиттифоққа парвозларни 20 декабрь оқшомидан то 2021 йил 6 январигача мувофиқлаштирилган ҳолда тақиқлаш бўйича келишишни режалаштирмоқда. Бундан ташқари, Европа Иттифоқи ва ЖАР ўртасидаги авиақатновлар чекланиши, Буюк Британия билан темир йўл ва паром алоқаси ҳам тўхтатилиши мумкин, дея ёзмоқда Meduza.

Жаҳон соғлиқни сақлаш ташкилоти 20 декабрь куни Британияникига ўхшаш коронавирус Нидерландия, Дания ва Австралияда ҳам аниқланганини эълон қилди. Аввалроқ Жанубий Африка Республикаси (ЖАР)да ҳам ўхшаш мутациядаги вирус топилгани ҳақида хабар берилган эди.