Тоғли Қорабоғда жойлашган Шуша шаҳридаги йўлларни миналардан тозалаш вақтида россиялик сапёр ҳалок бўлди. Бу ҳақда Россия Мудофаа вазирлигига таяниб, Meduza хабар берди.
«Портловчи қурилма портлаб кетди. Портлаш оқибатида Халқаро миналарга қарши кураш марказининг миналардан тозалаш гуруҳининг офицери оғир тан жароҳати олди. Ҳарбий хизматчига зудлик билан тиббий ёрдам кўрсатилган. Офицерни госпиталга олиб бориш жараёнида у олинган тан жароҳатлари оқибатида вафот этди», — дейилади идора матбуот хизмати хабарида.
Эслатиб ўтамиз, Россия иштирокидаги музокаралар натижасига кўра, низо томонлари ўт очишни тўхтатишга қарор қилди. 10 ноябрга ўтар кечаси Арманистон бош вазири Никол Пашинян Озарбайжон ва Россия президентлари Илҳом Алиев ва Владимир Путин билан Тоғли Қорабоғда ўт очишни ва жанговар ҳаракатларни тўхтатиш тўғрисида келишув имзолади.
Сулҳ шартлари Келбажар, Агдам, Лачин туманлари ва Газах туманида Арманистон томони эгаллаб турган ҳудудлар Озарбайжон назорати остига берилишини назарда тутади.
Баҳсли ҳудудга 2 мингга яқин Россия тинчликпарварлари киритилади, улар ўт очишни тўхтатиш режимига риоя қилинишини назорат қилади. Шунингдек, томонлар асирлар, марҳумларнинг жасадларини айирбошлашни бошлайди ва минтақада транспорт қатновини қайта тиклайди.
Мавзуга доир:
Изоҳ (0)